BOGOTA, COLOMBIA (AFP).- “Mi ta heteroseksual”, segun presidente di Colombia, Gustavo Petro, a skirbi riba X despues ku a pone un video di dje riba retnan sosial ku man tené di un hende muhé trans.
Imágennan di un hòmber bistí ku kamisa blanku huntu ku un muhé bistí na blou a sirkulá riba e plataforma X, ku e afirmashon ku ta trata dje mandatario kolombiano. E video supuestamente a keda grabá den e sentro históriko di Ciudad de Panamá, kaminda ku Petro tabata na okashon di instalashon di Jose Raúl Mulino komo presidente dje pais.
Sin konfirmá verasidat dje video, Petro a reakshoná riba e hopi komentarionan ku tabata hasi chèrchi di su supuesto kompania.
“Mi ta heteroseksual, pero nunka lo bosnan skucha òf lesa di mi parti un palabra kontra di otro géneronan. Pasobra ku esei no solamente lo mi stòp di ta hòmber, sino tambe humano”, segun e presidente a skibi riba su kuenta X.
Esnan ku ta bisa ku ta trata di Petro a mustra koinsidensianan den e paña ku e hòmber tabatin bistí riba e video i esnan ku e mandatario tabatin bistí ora ku el a yega e kapital panameño.
E presidensia no a pronunsiá riba e asuntu, pero di su parti siguidónan dje mandatario ta bisa ku ta un montahe.
“Semper ma konsiderá ku intimidat ta e “último ratio” di libertat, e último trinchera di ta liber, i lo mi konservá e prinsipio ei te ora ku mi skibi di mi mes òf muri”, segun Petro a agregá.
Petro, e promé iskierdista na poder na Colombia, ta un fuerte defensor di derechinan di LGBT, un grupo di kua gran parti a respaldá su yegada na presidensia den 2022.
