CIUDAD DE PANAMA (AFP).- E presidente eligí di Panamá, José Raúl Mulino, a gana e elekshonnan di 5 di mei danki na e popularidat di Ricardo Martinelli, pero awor ta tumando distansia dje eks-mandatario ku ta den asilo.
E abogado aki di 64 aña a sustituí Martinelli komo kandidato dje partido derechista Eealizando Metas (RM, inisialnan dje eks-gobernante), despues ku esaki no por a postulá su mes pa motibu di un kondena di 11 aña di prizòn pa labamentu di plaka.
Despues di a primintí den kampaña di lo yuda Martinelli, Mulino awor ta bisa di “no tin ningun akuerdo” ku e eks-presidente, kende ta sigui den asilo den embahada di Nicaragua for di febrüari, evitando di mester bai prizòn.
“Mulino por ta asumí un posishon nobo kontra di Martinelli pa motibu ku e eks-presidente ta un faktor di desekilibrio, preshon i di riesgo pa gobernashon en general, tantu riba tereno nashonal komo internashonal”, segun e sosiólogo Danilo Toro.
Apesar di su problemanan ku hustisia, Martinelli ta gosa di hopi popularidat na Panamá, sigur serka e klasenan mas abou kendenan por a gosa dje bonansa ekonómiko durante di su gobièrnu (2009-2014), pero ta rechasá pa sektornan komersial i di klase media, ku ta akus’é di korupshon.
Martinelli a partisipá den e último akto elektoral di Mulino via di un video. Inkluso, el a risibié den embahada di Nicaragua e mainta di elekshon.
Atversarionan di Mulino, ku lo sinta dia 1 di yüli, ta kere lo e faboresé e eks-mandatario ku un pordon ku ta pèrmiti’é sali for di e pais i bai Nicaragua.
Miéntras tantu, un enkuesta a revelá ku 65% di panameñonan ta kere ku Martinelli lo keda goberná tras di kortina, loke Mulino ta nenga rotundamente.
“Mi no tin ningun kompromiso. Tampoko Ricardo Martinelli nunka a pidi mi apsolutamente nada… mi tin mi kriterio i kere mi, e presidente di República de Panamá ta ami”, segun Mulino a bisa den un entrevista.
Mulino a ekspresá “Mishon kumplí, Ricardo”, riba e anochi di su triunfo, pa despues ni sikiera menshoná Martinelli den su diskurso di proklamashon, kuater dia despues.
Segun un analítiko polítika, “e presidente nobo poko poko pero sigur lo tuma distansia di Martinelli”, pasobra Mulino mester di apoyo empresarial i serka un parti dje sektor ei e eks-presidente ta “un piedra ku ta molestiá den sapatu”.
Ademas, e analistanan ta atvertí ku Mulino mester tene kuenta ku posishon di Washington, ku den 2023 a prohibí entrada di Martinelli i su famia na Merka pa motibu di korupshon.
