BEI J ING ( AP ) . – E presidente kubano Raúl Castro ta na China pa kombersá ku presidente Hu Jintao i otro lidernan den su promé bishita na China, un sosio komersial klave di e isla, for di despues ku el a asumí poder.
Castro a yega China ayera pa un bishita di kuater dia. Prensa estatal kubano a bisa ku e tabata kompañá pa un funshonario di rango haltu di e gabinete, Ricardo Cabrisas Ruiz, i e kansier Bruno Rodríguez. Ningun di e partinan a bisa e asuntunan ku nan lo trata.
Castro a bishitá Vietnam i China tempu ku e tabata minister di Defensa, un kargo ku el a okupá for di 1959 te ku 2008, tempu ku el a remplasá su ruman Fidel Castro komo presidente. Despues di China, e lo bishitá Vietnam.
Ounke e tres paisnan ta entre e últimonan ku un sistema komunista na mundu, China a habri pa negoshinan privá i a prosperá ekonómikamente miéntras Cuba ta hopi pober ainda.
Den un biahe na 1997 na China, Castro a papia ku un tono di elogio riba e meskla di sosialismo i liberalisashon di merkado den e pais asiátiko.
Cuba ta e sosio komersial mas grandi di China den Caribe. E komersio bilateral a yega 1.800 mion dòler den 2010, asina e wèpsait kubano Cubadebate a bisa.
