LIMA, PERU (AFP).- E presidente di Perú, Dina Boluarte, a sigurá ayera ku lo e goberná te 2026, ora ku su mandato kulminá, apesar dje hopi skandalnan di korupshon.
“Nos lo sigui kana te 28 di yüli di 2025. E pueblo a skohe un fórmula presidensial i konforme Konstitushon, mester respetá esei”, segun e mandatario.
Awe e presidente peruano, di 61 aña, mester komparesé den Korte pa deklará den un kaso yamá “Rolexgate”, e investigashon kontra di su persona den kuadro di un kaso riba oloshinan luhoso ku e no a deklará. Na mes momento e ta keda interogá pa represhon di protestanan ku a surgi tempu ku el a sinta den desèmber di 2023, den kua komo sinkuenta persona a pèrdè nan bida na man di polis i militarnan.
E mandatario ademas ta hañ’é ku un skandal di su ruman Nicanor Boluarte, kende a keda detené djabièrnè bou sospecho di ta komandá un grupo di korupshon ku ta nombra funshonarionan a kambio di soborno, probechando dje poder ku su ruman a dun’é.
Oposishon ya a anunsiá di lo presentá un moshon kontra dje mandatario. Pero promé ku esei, nan mester por haña firma di 26 parlamentario. Despues di esei, mester di voto di 52 di e 130 kongresistanan.
E presidente femenino a sinta den desèmber di 2022 remplasando Pedro Castillo, restituí i prezu pa su intento frakasá di disolvé Kongreso.
Inkluyendo Boluarte, ta seis e kantidat di presidentenan metí den kasonan di korupshon pa loke ta bai e siglo aki. For di 2016, Perú tabatin seis presidente den e pió ola di falta di stabilidat den historia moderno dje pais.
