TEHRAN, IRAN,AP.- Presidente ruso Vladimir Putin a ekspresá su sosten na e akuerdo nuklear ku Iran i ku potensianan mundial i a bisa ku Moscow ta oponé na “ kualkier kambio unilateral” despues ku presidente merikano Donald Trump a ninga di resertifiká esaki.
Putin a bishitá Tehran pa mantené un reunion trilateral ku mandatarionan di Iran i Azerbaijan dediká prinsipalmente na mehorá e komunikashonnan riba tera entre e tres paisnan bisiña riba Laman Kaspio.
Pero e akuerdo nuklear tabata hopi presente den e enkuentronan di Putin ku presidente iraní Hassan Ruhani, skohe pa un mayoria amplio e aña aki i e lider supremo ayatola Ali Jamenei, kende tin último palabra riba tur asuntu di estado.
“Nos ta oponé na kualkier kambio unilateral den e akuerdo multilateral”, asina Putin a bisa den e reunion ku Jamenei, segun un komunikado di ofisina di e lider supremo. “Nos ta oponé pa vinkulá e programa nuklear ku otro asuntunan, inkluyendo esun di defensa”.
Moscow a respaldá Tehran i Trump a ninga di resertifiká e akuerdo. Gran Bretaña, China, Fransia, Alemania i Union Europeo tambe a pidi Trump pa keda den e akuerdo.
