MADRID, SPAÑA (AFP).- E presidente di gobièrnu spañó, e sosialista Pedro Sánchez, a defendé e krítikanan ku el a ekspresá djabièrnè relashoná ku e ofensiva israelí riba Gaza, ku a pone ku gobièrnu di Israel a rabia.
“Kondená e atentadonan terorista di un grupo di terorista manera Hamas i na mesun momento kondená e matansa indiskriminá di palestinonan den Gaza, no ta un asuntu di partidonan polítiko i tampoko di ideologia, ta un asuntu di humanidat”, segun Sánchez a deklará.
Den un bishita djabièrnè na Rafah, ku ta konektá Gaza ku Egipto, Sánchez a deklará huntu ku e promé minister belga, Alexander de Croo, ku e “matansa indiskriminá di sivilnan” den teritorio palestino tabata “kompletamente inaseptabel”.
Despues di su deklarashonnan, e Ministerio israelí di relashonnan eksterior a konvoká e embahadornan di tur dos pais i a akusá nan di ta apoyá terorismo.
E minister spañó di Relashonnan Eksterior, José Manuel Albares, a informá djabièrnè ku e embahador israelí na Spaña a rechasá e akusashonnan.
Israel a lansa un ofensiva riba Gaza for di 7 di òktober, komo reakshon riba e atake dje movementu palestino Hamas kontra su teritorio ku a laga 1.200 morto. Despues di esei, e bombardeonan di Israel ku e meta pa eliminá Hamas, ta tumando lugá for di 27 di òktober, ku un suspenshon último dianan pa un tregua ku a kuminsá djabièrnè.
Hamas, ku ta goberná e teritorio for di 2007, di su parti a bisa ku e bombardeonan a laga kasi 15.000 morto den Gaza.
