WILLEMSTAD.- E bachatero Dominikano, Prince Royce dia 24 di febrüari próksimo lo lansa su albùm nobo titulá ‘Five’ ku lo konta ku kolaborashon di diferente artista.
‘Five’ lo inkluí dueto ku Shakira, Farruko, Chris Brown, Gente de Zona i otro artistanan.
Manera e título dje albùm, ‘Five’, esaki ta e di 5 albùm den e karera di Royce i su di kuater produkshon di bachata.
E vershon ‘deluxe’ dje albùm lo kontené 18 kansion i e vershon standart ta kontené 12 kansion.
Den e último dianan Royce a ofresé diferente ‘tip’ riba su albùm nobo riba retnan sosial, entre nan un serie di video kòrtiku ku ta kontené título i fragmento di kansion.