PORT-AU-PRINCE, HAITI (AFP).- E promé minister nobo di Haiti, Garry Conille, a deklará ku e tresementu bèk di seguridat i e lucha kontra di korupshon lo ta e prioridatnan di su gobièrnu ku resien a sinta. “Mi kerido kompatriotanan, Haiti ta enfrentá retonan grandi. Violensia i inseguridat a paralisá nos bida diario. E krísis humanitario ta hasi mas grave e sufrimentu di nos kompatriotanan mas vulnerabel. E falta di stabilidat polítiko tin nos sosiedat hogando”, segun el a deklará den un seremonia ofisial.
“Mi gobièrnu lo traha sin deskanso pa mehorá e kondishonnan di bida di kada haitiano”, el a primintí. I a agregá ku “sin seguridat, no por realisá ningun progreso duradero. “Pa logra esaki, ta krusial pa nos polis i sòldánan ta bon prepará pa enfrentá retonan aktual pa loke ta seguridat. I nos tin ku sòru pa nan tin e hèrmèntnan nesesario pa por hiba un mishon ku efikasia i profeshonalismo”.
E komposishon dje gabinete interino a keda anunsiá ayera den e korant ofisial di Haiti, Le Moniteur.
Haiti, ku ta sufri di un instabilidat polítiko króniko, den e último lunanan mester a enfrentá e kresementu di violensia di gèngnan, ku ta kontrolá 80% di e kapital, Port-Au-Prince.
Conille mas aleu a deklará ku e institushonnan di estado mester keda “saná i reforsá”. “E lucha kontra di korupshon lo ta un prioridat apsoluto di mi gobièrnu.” “Ta importante pa restourá e konfiansa” di haitianonan den nan outoridatnan, loke ta impliká “transparensia total den asuntunan públiko i sero toleransia kontra di korupshon”, segun el a asentuá
