KRALENDIJK.- E problema ku a surgi siman pasá, poniendo ku klientenan di banko MCB no por a swaip pa paga, tampoko saka na bankomátiko di e banko, tabata debí na e problema ku koriente ku Kòrsou a eksperensiá. Esaki MCB ta trese dilanti den un reakshon relashoná ku e malkontentu ekspresá pa klientenan di e banko. MCB ta trese dilanti den e komunikado: “Dia 9 di desèmber 2020 nos a risibí notifikashon ku nos ATMnan no tabata saka sèn ni tampoko no por a swaip na nos mashin nan di POS den negoshinan. Mesora nos téknikonan a kuminsá traha riba e situashon, ku a resultá di tabata debí na un interupshon di konekshon entre Boneiru i Kòrsou.”

“E artíkulo ta menshoná un situashon di algun dia, pa ku nos Banko e situashon menshoná tabata riba djarason (9 di desèmber 2020), parti mèrdia, ku a dura máksimo 2 ora. Despues di esaki tur hende por a swaip i lanta sèn bek. MCB ta pidi su diskulpa pa esaki, i naturalmente manera semper ta keda habrí pa duna informashon kaminda esaki ta nesesario.”

Di akuerdo ku gerensia di MCB, tambe nan ta analisando e situashon di nan bankomátikonan (ATM) pa mira kon por elevá e servisio aki aun mas. Na e momentu nan aki nan tin 12 bankomátiko den servisio na puntonan stratégiko pa por proveé e servisio di kèsh, purbando asina tambe pa semper tin un alternativa si akaso unu ta for di servisio temporal. Por sosodé enbèrdat, i esaki ta mayoria biaha fi n di luna, ku un ATM por resultá sin sèn.

Motibu prinsipal di esaki ta ku ainda ta usa hopi plaka kèsh komo manera prinsipal di pago. “Nos a bini ta enkurashá, i lo sigui hasi esaki, pa nos klientenan hasi mas uso di nos servisionan digital i ‘self service’ ku ta mas efi siente, safe i barata. Naturalmente semper ta konsehabel pa tin algu di kèsh na man komo bèkùp”. MCB lo sigi hasi su máksimo esfuerso pa keda duna e servisio ku nos klientenan ta meresé.