WILLEMSTAD.- Tal manera por a premirá tin problema ku pago di karchinan ku a keda bendí pa Curaçao Ponton Festival 2018.
Siman pasá e organisashon a kanselá e evento kompletu i a primintí ku ayera djaweps nan lo a start ku e proseso pa debolbé tur hende ku a kumpra karchi delantá nan sèn bèk.
For di momentu di kanselashon ta masha hopi reakshon i opservashon tabatin pa e manera ku esaki a tuma lugá. Reklamo di esnan ku a kumpra karchi i tambe reklamo di promotornan ku a sigui henter e proseso i ku no a keda niun tiki kontentu pa e manera ku a kanselá e evento, sigur si a tuma nota di diferente desishon ku a keda tumá den e último dos simannan previo kanselashon dje evento i tambe e motibunan pakiko a kanselá e presentashon di sierto dje artistanan.
‘DEN E BEMBE’ ta kompartí ku su lektornan e komunikado ku e organisashon di CPF 2018 a manda.

KOMUNIKADO CPF
Manera nos a palabrá i komuniká siman pasá durante e rueda di prensa pa ku e kanselashon di CPF 2018, nos kier informá boso lo siguiente.
Na promé lugá nos intenshon primario ta ba debolbé tur esnan ku a kumpra nan karchi di entrada pa ku Curaçao Ponton Festival nan sèn mas pronto ku ta posibel bèk. Den mesun rosea nos ta konsiente  ku yega na un solushon riba un término kòrtiku ta hopi difísil i no realístiko mirando e embergadura di e daño finansiero ku e evento aki a sufri.
Pero manera nos a antisipá nos lo a kuminsá hasi e trámitenan nesesario pa e siman aki nos duna mas detaye pa ku debolbé e sènnan di karchinan ku a wòrdu kumpra pa ku CPF.

Promé fase di debolbé
Nos por komuniká na boso ku tur kumpradó nan di karchi ku a hasi uso di nan karchi di Funmiles ya kaba por a kobra nan karchinan via di Funmiles. Pues e promé fase di debolbé e sèn di karchinan di entrada ta yegando su final i nos ta agradesido pa ku esaki.
Na e momentonan aki nos ta trahando duru pa yega na solushonnan mas lihé posibel pa asina por kumpli ku e kumpradónan di karchi pero tambe ku tur e otro debedornan ku no a logra kobra ainda pa nan servisionan brindá òf servisionan ku nan mester a brinda na CPF 2018.
Nos lo bai komuniká mas pronto posibel e siguiente fase ku boso, pa asina esnan konserní por tuma nota di esaki i alabes aktua sigun e instrukshonnan ku nos lo komuniká na boso. No ta keda nos otro opshon di debolbé den diferente fase mirando ku e parti finansiero di CPF 2018 te ainda ta hopi debil.
Nos ta gradisí esnan konserní pa boso pasenshi i tambe un biaha mas despensa pa e situashon fèrfelu ku a surgi. Yega na un solushon ta nos meta prinsipal i nos ta spera ku otro nan lo no stroba nos mas pa por hasi esaki. Forma i mantené  un show rondó di e tragedia aki lo no yuda pero lo hasi e situashon aun mas debil.