WILLEMSTAD.- ‘DEN E BEMBE’ a kombersá resientemente ku Percy Pinedo, bosero di Fundashon Bon Intenshon riba aktividatnan ku e fundashon a organisá den 2018 i loke ta pendiente pa 2019.
Manera ta konosí Fundashon Bon Intenshon ta organisadó di Curaçao International Film Festival Rotterdam. E aña aki a tuma lugá e di 7 edishon di CIFFR riba dianan 11 pa 15 di aprel 2018.
Pa loke ta e evento riba su mes Percy a indiká ku bo ta traha henter aña riba e proyekto. ‘Bo ta haña invitashon pa diferente festival ku tin rònt mundu, spesialmente den Karibe. Pa nos e ta kulminá ora ku nos hasi nos bishita na IFFR ku ta tuma lugá na fin di yanüari 2019. Tin diferente pelíkula ku bo ta pone den bo radar, ku lo ta pelíkulanan atraktivo pa pueblo di Kòrsou mira. Esei ta loke nos ta hasi. Nos tin un kantidat di pelíkula selekshoná’, asina Percy a kuminsá na bisa.
E aña aki CIFFR tabata mas grandi ku añanan anterior. ‘Bo ta yegando bo pik. Bo por haña mas hende ta bin aserka, algun 100 pero ta te ei e públiko por yega.

POSITIVO
Un dje kosnan positivo dje aña aki ta e echo ku pa motibu di CIFFR produkshonnan lokal a bira mas tantu. ‘Ya mi por pronostiká ku tin sigur tres produkshon lokal ku sigur lo tei den e edishon di 2019. Nos ta kontentu ku el a pone produktornan, regisor i skibidónan pa nan por produsí mas tantu pelíkula. Nan a hasi esei i ta e kosnan positivo, e resultado i balanse positivo di CIFFR’, asina Percy a indiká.

TRES PRODUKSHON LOKAL
‘Tin tres produkshon lokal ku nan ta kabando. Ta dependé kon lihé nan kaba ku definitivamente nos lo tin nan otro aña. Ta trata di e dokumental di Rudi Plaate, Wim Statius van Eps i Yubi Kirindongo. Ta produkshonnan ku tin ku nos ta kere ku nan ta bale la pena pa nos por bin ku nan otro aña. Ku nan kaba na tempu nos por presentá nan’, Percy a indiká ku konfiansa.

CARIBBEAN SHORTS COMPETITION
Pa loke ta trata e kompetensia di pelíkula kòrtiku, ‘Caribbean Shorts Competition’ e organisashon ta na altura di diferente produkshon ku si nan kaba na tempu lo keda presentá.
Percy a splika ku nan CIFFR ta trahando den estrecho koperashon ku e proyekto ’48 Hours’, un proyekto di hóbennan ku ta traha pelíkula. ‘Nos a hinka nan tambe aworakí den e parti aki. Nos punto di atenshon tabata e embolbimentu un tiki mas di hóbennan den esei, den 2019 lo bo bai mir’é mas tantu. Nos ta bai embolbí hóbennan muchu mas tantu den e proyekto di CIFFR’, asina Percy a terminá bisando.