TEXAS.- Den luna di yüli último e ekipo di Texas Rangers tabata interesá den e picher habridó di Chicago White Sox kende ta Jose Quinanta. Durante dje negosiashonnan ku tabatin, un dje hungadónan ku White Sox a eksigí tabata e kurasoleño Jurickson Profar. Loke ku a pone ku e negoshashon no a progresá tabata ku White Sox a pidi pa muchu mas prospekto ku e ekipo di Rangers tabata kier a laga bai.

Tin spekulashon ku awor aki e dos ekiponan por reanudá negoshashon. E ekipo di Rangers ta buskando picher habridó pa nan rotashon. E promé dos habridónan ta kla kaba den persona di Cole Hamels i Yu Darvish pero despues di Martin Perez i Andrew Cashner, kende ámbos no tabatin bon temporada, nan no tin masha opshon internamente.

Quintana di 27 aña, lo ta un mehoransa balioso pa Rangers kende segun informashon ainda no ta dispuesto pa laga Profar bai den un kambio. No tin muchu opshon riba merkado di agente liber i segun informashon e ekipo di Rangers ainda ta interesá den un bateadó manera Edwin Encarnacion. Pues si nan por logra haña un picher habridó mediante un kambio lo e mester ta un picher ku no ta muchu karu i ku ta bou di kòntròl di e ekipo pa algun aña.