WILLEMSTAD.- James Hunter Six, Michelle David & The Gospel Sessions, Selwyn Birchwood i Thornetta ta kompletá e programa di e di tres edishon di Curaçao International BlueSeas Festival! E festival di kaya grátis den e kayanan históriko di Pietermaai ta tuma lugá djabièrnè 30 i djasabra 31 di mart. E programa kompletu ku orario i stage ta riba nos wèpsait.
E kantante Ingles di R & B/soul i guitarista James Hunter a fungi komo back-up vocalist pa Van Morrison i a aktua hopi den pre- show pa entre otro Aretha Franklin, Etta James, Willie Nelson i Tom Petty. Na 2006 a rekonosé e talento di James Hunter ora e la haña nominashon pa un Grammy Award pa People Gonna Talk i un American Music Award komo Best New Artist. E agrupashon James Hunter Six, ta konsistí di  Jonathan Lee, drums; Lee Badau, barítonosaxofon; Damian Hand, tenòrsaxofon; Andrew Kingslow, piano/perkushon i Jason Wilson riba bas.
E kantante merikano Michelle David huntu ku e guitaristanan Onno Smit i Paul Willemsen, a kambia Gòspel hibando esaki bèk den su forma original, ku un aserkamentu minimal. Sin òrgel Hammond, pero ku guitara i tamburein. E resultado ta un zonido mas rafiná ku ta poné bo pensa riba Sam Cooke i Bobby Womack, ku un snèif di Funk, Soul i Afrobeat. Na 2014 nan promé albùm a mira lus di dia: The Gospel Sessions Volume 1.
E “lap steel” guitarista, kantante i kompositor  di blues Selwyn Birchwood a nanse na Orlando, Florida, i na 2014 a drenta mundu internashonal di Blues ora e la gana un Blues Music Award ku su debut album Don’t Call No Ambulance. E ta tin diferente aktuashon den pre-show pa entre otro Robert Cray i Buddy Guy i a kompartí stage ku Joe Louis Walker (BlueSeas Festival 2016). Su mas resien albùm Pick Your Poison a subi lista Billboard Blues Chart na number # 6.
E kantante di Detroit Blues i r&b Thornetta Davis a gana mas ku 30 Detroit Music Awards komo Best R&B/Blues Vocalist i Best R&B Group i a drenta Detroit Music Hall of Fame. Den su karera asina impreshonante e la aktua pa artistanan legendario di blues manera Ray Charles, Gladys Knight, Smokey Robinson i Buddy Guy. Aña pasá su último albùm, Honest Woman tabata nominá pa un Blues Music Award den kategoria Best Emerging Artist Album.
Ku esaki e programa kompletu di e di tres edishon ta konsistí di: Kenny Neal, Michelle David & The Gospel Sessions, Samantha Fish i Selwyn Birchwood riba djabièrnè  30 mart 2018. Miéntras ku djasabra 31 mart Danielle Nicole, James Hunter Six, Thornetta Davis i Toronzo Cannon lo ta riba stage.
Curaçao International BlueSeas Festival ta un inisiativa di Fundashon Bon Intenshon i produsí pa Mojo Concerts.