WILLEMSTAD.- Curaçao International Film Festival Rotterdam ta organisá tambe pa e di 8 edishon di 10-14 di aprel, funshonnan spesial di sine den The Cinemas pa laga alumnonan di skol di fundeshi i di enseñansa avansá sera konosí ku e festival i e sorto di pelíkula ku ta keda presentá.

Skol di fundeshi
Djaweps 11 i djabièrnè 12 di aprel e festival ta yama e alumnonan di skol di fundeshi di e gruponan 6, 7 i 8 bon biní. E pelíkula Supa Modo lo sòru pa un eksperensia úniko di teater i festival pa e hóbennan. E pelíkula aki lo demostrá kiko un amistat berdadero ta nifiká: e mucha Jo di 9 aña ta opseshoná ku pelíkula di héroenan i loke e ta soña di dje ta pa bira un super héroe. E tin un malesa terminal i su soño lo no por bira realidat. Of tòg si? Tin introdukshon di e pelíkula i despues tin oportunidat pa hasi pregunta. Idioma ta papiamentu òf ulandes. Skolnan ku a inskribí lo haña un karta di lès ku ta forma base ku por prepará e bishita na e festival i/òf pa por diskutí despues di e presentashon.

Enseñansa avansá
Djaweps 11 i djabièrnè 12 di aprel tin pa e klasnan superior e pelíkula Keniano Rafiki ta programá. E pelíkula kolorido tokante amistat entre dos mucha muhé Keniano: Kena i Ziki. Nan ta deseá amistat i amor berdadero i no un bida laf di ta un señora obedesidu den suburbionan di Afrika. Ta te ora nan namorá di otro nan ta komprondé kon konservador e mundu den kua nan ta biba ta. Pa skolnan ku a inskribí tin un karta di lès disponibel ku tarea en preparashon riba e bishita di festival i komo diskushon despues di e pelíkula. E pelíkula aki tambe ta keda introdusí den teater i despues di funshon ta sigui deliberashon ku e hóbennan.

Inskripshon
Partisipashon na e programa di edukashon ta grátis i ta a base di yen ta yen. Skolnan ta invitá via e-mail pa nan inskribí pa mas tardá 18 di mart. Si no a haña karta di invitashon por tuma kontakto ku Percy Pinedo via e-mail Percy.pinedo@gmail.com.