Gobièrnu di Aruba a kaba di tuma un desishon drástiko!

ORANJESTAD – Gobièrnu di Aruba a kaba di anunsiá un medida bastante drástiko, den sentido ku di inmediato ta prohibí tur tipo di stèp, inkluyendo e-step i asta e-bike riba kamindanan públiko. Ministro di Hustisia, Arthur Dowers, a konfirmá e desishon djamars mainta durante un konferensia di prensa, asina NoticiaCla ta informá.

Segun e mandatario, kualkier persona ku polis topa riba kaya usando un di e vehíkulonan aki, lo haña un but di 500 florin. Ademas, outoridatnan lo konfiská e stèp mesora. Minister Dowers a splika ku aktualmente no tin ningun base legal ku ta permití uso di e vehíkulonan aki riba kamindanan públiko, ni tampoko no tin un solushon rápido pa regulá esaki.

"Ta momento pa nos tene control firme," e minister a bisa. "Tur stèp motorisá, sin eksepshon, si nan ta riba tereno públiko, ta ilegal. No tin ningun lei ku ta permití nan riba nos kayanan." E minister a mustra ku e desishon ta bini prinsipalmente pa motibu di seguridat. Segun e, uso di e-step a oumentá, spesialmente den área turístiko, unda algun usuario ta kore riba kaminda, kòrta dilanti tráfiko i pone peatonnan i shofùrnan na riesgo. Outoridat polisial ya a kuminsá ku kontròlnan i lo intensifiká esaki den e dianan ku ta bini. Ora para un persona riba kaya ku un stèp, esaki lo haña un but i e ta pèrdè e stèp mesora.

No por hür stèp mas, e ta ilegal

Gobièrnu tambe a aklará ku hürmentu di stèpnan riba Aruba ta ilegal si no tin pèrmit ofisial di Ministerio di Transporte. "No por hür stèpnan na Aruba. E situashon ta kompliká mas, paso hopi di e kompanianan ku ta ofresé e servisio aki no ta registrá ofisialmente. Diferente di otro tipo di vehíkulo, outoridatnan no tin informashon ken ta e doño di e stèpnan ku ta

riba kaminda públiko.

Atvertensia na propietarionan

Gobièrnu a duna un atvertensia kla na tur propietario y kompanianan ku tin stèpnan riba isla. Nan tin e oportunidat pa kita nan vehíkulo boluntariamente. Si no, outoridatnan lo prosedé ku konfiskashon. Si konfiská un stèp e propietario mester tuma kontakto ku outoridatnan pa rekuperá esaki, ademas di paga e multa korespondiente. "Si bo laga bo stèp riba kaminda públiko, nos lo bai kuné," ministro a bisa kla. "Y despues bo lo mester paga pa haña esaki bèk." Gobièrnu ta hasi un yamada na komunidat pa koperá y respetá e medida nobo, ku tin komo meta prinsipal mantené seguridat riba kaminda y redusí situashonnan peligroso den tráfiko.