WILLEMSTAD.- Riba ‘Dia di Bandera’ e organisashon ‘Project Ç’ a presentá nan proyekto den Nieuwestraat.
‘Project Ç’ ta konsistí di un serie di entrevista ku 16 diferente dama di diferente nashonalidat, gremio sosial, edat i profeshon.
For di e serie di entrevistanan a skohe ekspreshonnan inspirativo ku a keda tradusí den potrètnan artístiko. E 16 potrètnan ku ekspreshonnan inspirativo pa e próksimo 6 simannan lo keda eksponé den airu liber den Niewestraat na Pietermaai. E telanan ku e damanan a usa riba e potrètnan ta simbolisá nan konekshon.
‘Project Ç’ na un manera kreativo i inspirativo ke duna su aporte pa reforsá e konekshon entre e diferente gruponan i yunan di Kòrsou en general, un faktor importante pa konstruí un pais fuerte.
‘Project Ç’ ta un konsepto di Inonge Anandala, artista i estilista, Jouke Schauwaert, eskritor i lingwista i e fotograf, Marcel Truyens. Huntu ku e 16 damanan nan a realisá e proyekto aki.
E eksposishon pa e próksimo 6 simannan lo por ser mira den Nieuwestraat, Fuikstraat i Fuiksteeg na Pietermaai. Entrada ta grátis.
‘Project Ç’ a bira posibel danki na Ennia, Project 3 studios, Caribbean Legacy i Pietermaai District. Pa mas informashon sigui e página di facebook di ‘Project Ç’.