WILLEMSTAD.- Awe, djaweps 7 di sèptèmber ta kuminsá e proyekto piloto speshal ‘Leerorkest Curaçao’ na Kolegio Maria Auxilliadora. Alumnonan di e skol aki lo haña lès di músika serka profeshonalnan di músika i pa na final forma un orkesta. E proyekto piloto ‘Leerorkest Curaçao’ aki lo duna diferente presentashon i na final lo sera e aña aki ku un presentashon grandi riba 2 di yüli 2018 riba Brionplein.

Djaweps dia 7 di sèptèmber 2017, ta e inisio ofisial di e promé lèsnan na Kolegio Maria Auxilliadora, Santa Maria 80, (8:30 am ) e skol ku Tania Kross a bishitá. Tania ta un di e embahadornan di e proyekto aki. Muchanan di Santa Maria, Kanga, Dein, Cabo verde i Steenen Koraal ta bishitá e skol aki. Den lunanan ku a pasa a selekshoná e dosentenan di músika di Kòrsou ku lo haña training serka e dosente prinsipal di e proyekto den e método ku lo usa.

‘Leerorkest Curaçao’ ta algu nobo ku a sali for di e ‘Leerorkest Nederland’ ku ta eksistí mas ku 11 aña kaba. Fia kada mucha un instrumento, siñ’é toka esaki i lag’é toka huntu den un orkesta sinfóniko bibu, dilanti un públiko grandi i kisas tambe na radio i/òf televishon.

E idea ta pa hasi e muchanan orguyoso, duna nan plaser, siña nan algu i tambe mustra nan kiko tur nan por ku e guia, atenshon i dedikashon. Sigur e muchanan ku ta biba den e barionan kaminda enseñansa di músika i toka den orkesta no ta algu kustumbrá.

Segun Marco de Souza, fundadó di ‘Leerorkest’, tur kos a kuminsá ku ora nan a disidí bòltu e kosnan. “Ora nos a kuminsá mas ku 10 aña pasá na Amsterdam Zuidoost, nos a ripará ku e muchanan no tabata bin e skol di músika. Pues nos a disidí hiba e skol di músika pa nan pero durante orario di skol, pasó bo tin tur huntu i bo por alkansá tur. Awor nos ta ban hasi meskos aki na Kòrsou. Nos ta kuminsá den Santa Maria pero di nos parti hopi skol mas lo por partisipá.”

Artistanan famoso i konosí lokalmente i internashonal, manera Tania Kross, Izaline Calister i Noraly Beyer, ta dispuesto pa partisipá den e proyekto di ‘Leerorkest Curaçao’.

Dennis Aalse, dirigente di orkesta hubenil di Kòrsou ta fungi komo konsehero artístiko. Den estrecho koperashon ku orkesta hubenil Curaçao di Dennis Aalse, Do-Re-Music, Kurá di Arte, Kiwanis Piscadera, dosentenan i komishon di mayor di Kolegio Maria Auxilliadora i RK Schoolbestuur lo traha un infrastruktura nobo i desaroyá un vishon nobo pa enseñansa di músika i ehekutá esakinan.