WILLEMSTAD.- E promé paso pa un programa eksitoso nobo di aktividat pa sostené e lucha kontra kanser ta e estreno lokal di e pelíkula ‘Wonder’ dia 16 di novèmber awor. Esei ta kore baiskel ku man di moda ku hende ku hèndikèp tambe por partisipá. Esaki i mas informashon a bin dilanti awe tardi na e anual konferensia di prensa kick-off pa ‘Ride for the Roses 2018’ den kurá di Landhuis Cerrito ku su spònser prinsipal ORCO Bank.
Pa e rekoudashon di fondo, esun mas grandi na Kòrsou, e meta final ta i ta keda pa tur su sekshonnan rekoudá mas tantu plaka posibel pa Fondo Prinsesa Wilhelmina Fonds (PWF).

E pelíkula Wonder

E promé parti di e programa di aktividat ta djaweps dia 16 di novèmber na momentu ku ta pasa e pelíkula nobo Wonder durante un anochi festivo den The Cinemas in Riffort.
Esaki ta e storia di un mucha hòmber di 10 aña yamá August ‘Auggie’ Pullman ku danki na sosten di su mayornan, ruman muhé, dosentenan, un amigu i un amiga ta pasa un periodo difísil na un skol básiko normal. Na skol nan tabata tent’é pa su kara desformá, loke ta resultado di numeroso operashon. E lucha ku e mucha aki a hiba kontra tentamentu na skol, riba kaya, i tur otro kaminda ta demostrá un tenasidat pa por superá tur esaki. Su aseptashon ta total ora e skol ta honr’é na final di e aña eskolar pa su méritonan spesial.
E pelíkula ta basá riba e novela pa mucha ku e mesun título ku Raquel Jaramillo bou di e seudónimo R.J. Palacio a trese riba merkado na febrüari 2012. E tabata inspirá pa e teksto di e piesa ‘Wonder’ di e kantante Nathalie Merchant. Den e pelíkula e papel di e mama ta pa e aktris Julia Robert ku a gana hopi premio Grammy kaba i ku na final di e pelíkula ta yama su yu hòmber ku tantu nan a tenta un ‘milager’.
E loke ta bai rekoudá ku e pelíkula aki ta bai manera semper finalmente i kompletamente pa e fondo pa kombatí kanser, PWF.