WILLEMSTAD.- Djasabra dia 15 di yüli ta bai tin un tremendo fiesta na Kas di Doble, Jan Boos 21. A yam’é "Love Party" (Fiesta Di Amor).

T’asina bèrdat ku Valentine's Day ta ofisialmente dia di namoradonan, pero 4 for di 5 bia' e fecha aki 14 febrüari ta kai malu, esta nèt den temporada di festival di tumba òf Karnaval. Pa kolmo e ta kai mayoria di bia' den siman.

Ademas Valentine's Day ta netamente pa esnan ku tin nan hende kaba. Pues tin nesesidat pa un dia ku ta tantu p'esnan ku tin nan Amor kaba, komo pa esnan ku ta buskando nan tapadera ainda.

Konsiderando tur esaki, nos a pensa pa proklamá e di tres djasabra den yüli komo "Dia di Amor". Lo inougur'é ku e promé:"Fiesta di Amor", o sea: e Promé Love Party. Naturalmente e músika ta na enkargo di Doble R, Era i tambe Argenis Huerta.

Komo artista invitá lo tei nos legendario Romeo Heye. E fiesta aki ta spesialmente pa fanátikonan di kurason, i lo ta un fiesta nèchi pa hende nèchi den un ambiente èkstra romántiko!  P'esei sigurá bo karchi na tempu, pasobra ora kaba a kaba "op is op".

Por haña karchi Na Mensing's Caminada, Arco Iris, Time to Time i na Jan boos # 21 Tin sekshon di V.I.P. tambe pa esnan ku ta deseá. Kontribushon pa V.I.P. ta inkluí tur kos. Pa informashon yama 767-0231 òf  524-2431.