WILLEMSTAD.- Riba 28 di sèptèmber 2017 lo lansa e promé fondo pa sinematografia bou di e nòmber Fondo Alex Alberto. Ku e fondo aki lo sostené sineastanan lokal pa desaroyá nan ideanan sinematográfiko. Esaki ta sali for di e konvikshon ku tur bon pelíkula ta kuminsá ku un plan elaborá i sólido. Ku kreashon di e fondo aki, inisiadónan ke aportá na desaroyo di sinematografia lokal.

Curaçao Filmboard Foundation, Kas di Kultura Kòrsou i Prins Bernhard Cultuurfonds Caribisch Gebied (PBCCG) a uni forsa pa usa e dokumental 'Yamada' komo okashon pa hasi rekoudashon pa Fondo Alex Alberto. PBCCG lo keda responsabel pa maneho di e fondo nobo. Meta di e fondo ta pa sostené sineasta di Kòrsou den desaroyo di nan produkshon. Den e sentido aki Fondo Alex Alberto ta e promé fondo pa sinematografia na Kòrsou.

Riba inisiativa di Michel Drenthe di Caribbean Filmcom i Curaçao Filmboard Foundation (CFF), PBCCG a investigá posibilidat pa supsidiá desaroyo di pelíkula lokal. Huntu a disidí di lanta un fondo spesial pa e meta aki.

E fondo ta karga nòmber di Alex Alberto ku ta konosí komo pionero ora ta trata di filma i dokumentá akontesimentunan di gran importansia. Ku un vishon delantá el a pèrkurá pa su grabashonnan keda wardá pa desendientenan. Despues di e presentashon spesial di ' Yamada' lo duna mas informashon tokante e Fondo Alex i tur kondishon pa bin na remarke pa un kontribushon.

Drenthe i su kompania di produkshon Caribbean Filmcom ta pone 'Yamada' ku ta un dokumental nobo, disponibel gratuitamente pa e okashon. 'Yamada' ta un inisiativa di CFF i Caribbean Filmcom. Alabes e ta un soño konservá, ya pa hopi tempu kaba, pa Michel Drenthe (produktor) i Sharelly Emanuelson (direktor).

E okashon pa kual ta traha e dokumental ta aniversario di Grupo Serenada ku ta selebrá nan kuarenta aña di eksistensia. E produktornan a sigui Grupo Serenada durante un aña. Den 'Yamada' nos ta sera konosí ku miembronan di Serenada i ta deskubrí kiko ta motivá nan. Tambe nos por opservá tur preparashon pa e konsierto di hubileo i grabashon di nan DVD. Elementonan ku a pèrkurá ku pa kuarenta aña largu Grupo Serenada a investigá i presentá muzik di Kòrsou. Esaki ta nan meta i pashon di bida.

E presentashon spesial aki lo tuma lugá den Siman di Kultura, riba 28 di sèptèmber 2017 na The Cinemas, pa 8 ‘or di anochi. Kas di Kultura ta djòin e proyekto, no solamente pa organisá e presentashon spesial aki, pero prinsipalmente pa por presentá e pelíkula pa 5 dia konsekutivo na skolnan (di 25 di sèptèmber pa 29 di sèptèmber 2017). Durante e presentashonnan pa skol lo tin representante den sala di grupo Serenada i di produktornan.

Bo ke aportá na desaroyo di sinematografia na Kòrsou? Bo ke ta presente na e presentashon spesial di e dokumental ‘Yamada’? Kumpra un karchi pa e presentashon spesial aki. Karchi ta na balor di NAf 50- . E karchinan ta optenibel serka Curaçao Filmboard Foundation, Kas di Kultura i PBCCG.

Pa karchi òf pa mas informashon por tuma kontakto ku:

Curaçao Filmboard Foundation Michel Drenthe

info@filmcom.nl // 738-62 06.

Kas di Kultura Cathy Leito

leitom@kasdikultura.cw // 522-1775

Prins Bernhard Cultuurfonds Caribisch Gebied Michèle Russel-Capriles

info@pbccaribbean.com // 767-1584

‘YAMADA’

‘Yamada ta konta e historia di ‘Grupo Serenada’, e koro popular di Kòrsou bou di guia di Harry Moen. 'Grupo Serenada' pa mas ku 40 aña ta kuidando e kantika tradishonal na Papiamentu aktivamente.

Serenada ta studia e kantikanan original i hasi presentashon. Lokual a kuminsá komo un eksperimento di un rockband di hóben ku un koro di misa, a desaroyá den un pashon berdadero. Ku dedikashon i éksito a sigui ku e trabou pa kuida i deleitá públiko ku e kolorido patrimonio musikal, kombiná ku ritmo animá i baile. Hasiendo esaki di tal manera ku generashon ku ta sigui, tambe por disfrutá di dje.

Pa nan hubileo Serenada a graba un DVD ku kantika ku ta representativo pa nan obra di 40 aña. E dokumental ta sigui kompilashon di e DVD for di bista di Harry Moen, lider musikal di e grupo i su miembronan individual.

Kombersashonnan íntimo i momentunan inesperá ta laga nos sera konosí ku motibunan individual i kolektivo di e grupo. Ta dediká tambe atenshon na futuro: Lo tin un Serenada despues di Harry Moen? Tin un susesor? Papiamentu lo ta eksistente aki 30 aña?

Den e proseso di grabashon di e DVD por nota kualidatnan di e grupo manera nan foko duradero, dedikashon, amistat i loyalidat na otro, disiplina, amor i perseveransia. Kualidatnan ku ta pone ku Serenada tei ketu bai.

E dokumental ta trese e zonido úniko di Serenada i tambe ta yama apresio pa su historia asina spesial. E dokumental ta sigui kompilashon di e DVD for di bista di lider musikal di e grupo i su miembronan individual.