OTTAWA, CANADA, AFP.- Polisnan kanades a menasa ku arestá manifestantenan ku a protesta den sentro di Ottawa i interumpí komersio na frontera. Promé minister Justin Trudeau a bisa ku e manifestashon ta “inaseptabel”.

Trudeau a atvertí ku e blokeo di trùknan di dos brùg importante ku ta konektá Canada ku Merka ta un menasa pa e pais su rekuperashon ekonómiko di e pandemia.

E alkalde di Ottawa a bisa ku e situashon a sali for di kòntròl i el a deklará un estado di emergensia.

E protestanan a kuminsá den yanüari, despues ku a introdusí e rekerimentu pa tur shofùr di trùk vakuná i isolá ora nan krusa frontera entre Merka i Canada.

Pero e manifestashonnan a plama den protestanan mas amplio kontra restrikshonnan di COVID i Trudeau su gobièrnu liberal.