Despues ku Merka a ataka Venezuela i bai ku presidente Maduro

ORANJESTAD.-Relashoná ku e situashon aktual na Venezuela gobièrnu di Aruba, den persona di promé minister Mike Eman a duna informashon na prensa di Aruba. FAA merikano a prohibí buelonan komersial for di Merka pa Karibe despues di e atake ku a tuma lugá riba Venezuela.

Den su promé palabranan sr. Eman a duna di konosé ku for di mardugá e ta den kontakto ku e diferente servisionan hasiendo análisis di e situashon na Venezuela. Tambe tin kontakto ku promé minister hulandes Dick Schoof. Schoof a duna di konosé ku Rei Willem Alexander a mustra interes pa e situashon. A informá presidente di Parlamento i tur otro órgano importante di loke ta pasando i pendiente pa informashon adishonal ku lo por informá den un Senioren Convent.

Tin atenshon di gobièrnu ulandes kompletu ku konforme Statüt ta responsabel pa defensa di e islanan aki. Tambe tin kontakto ku promé minister Pisas di Kòrsou pa huntu ta prepará den e region aki. Pa loke ta trata arubanonan na Venezuela, tin un adrès spefisiko unda nan por tuma kontakto. Reino tambe a manda sms pa tur hende di reino hulandes na Venezuela pa tuma kontakto. Pa algun tempu kaba tin alerta pa hende di reino biaha pa Venezuela.

Buelonan di kompanianan di aviashon ku mester sali for di Aruba òf esnan ku mester yega Aruba for di Merka ta kanselá. Kruseronan ta kontinuá. Segun sr. Eman no tin ningun motibu pa pániko, pa loke ta trata seguridat por nota ku tur kos por sigui normal na Aruba. A chek ku tur minister di Aruba pa sigui e desaroyonan. E situashon aktual ta unu ku ya kaba tabata un di e posibilidatnan i p’esei tabata prepará i pa e motibu ei tambe gobièrnu di Aruba por a aktivá. Trankilidat den komunidat ta trese pregunta i p’esei ta duna informashon na komunidat di Aruba. No tin motibu pa ningun preokupashon.

Manera EXTRA a informá kaba, den un atake militar merikanonan a drenta Venezuela i a bai ku presidente venezolano Nicolaas Maduro i su kasa.