PORT AU PRINCE, HAITI (AFP).- Despues di tres siman di kombersashon, e konseho presidensial di Haiti a nombra Garry Conille komo promé minister nobo dje pais. Riba Conille su skoudernan ta pisa e tarea pa saka e pais for di un profundo krísis, ounke e mes tin koutela mirando e magnitut dje tarea ku e tin su dilanti.
Conille, dòkter di profeshon kende ya tabata promé minister dje pais durante un periodo kòrtiku entre 2011 i 2012, te ku awor tabata direktor regional di UNICEF.
Conille tin un tarea monumental: Trata di saka Haiti, batí pa gèngnan, for di su krísis polítiko profundo, tambe krísis di seguridat i krísis humanitario.
“E tin hopi trabou su dilanti”, segun e antropólogo Vermont Saintyl. I “un responsabilidat pa ku e nashon pasobra e mester sirbi un gobièrnu ku no a keda eligí pa e pueblo, sino imponé pa komunidat internashonal”.
Saintyl a referí na e negosiashonnan entre funshonarionan haitiano i vários pais i organisashon, sigur e Komunidat di Karibe, ku a resultá den formashon di un gobièrnu di transishon despues dje renunsia di promé minister Ariel Henry.
Pa e dosente James Innocent, Conille tin e bentana di konosé e funshon i di tin hopi eksperensia internashonal; “Awor e mester lucha pa salba e pais”.
“Mi ta apoyá tur hende ku ke hasi algu positivo pa salba e pais. “Nos ta skucha tirunan tur dia…no por sigui asina”, segun e dosente.
Merka a reakshoná ku satisfakshon riba e nombramentu di Conille, miéntras ku presidente di Kenia, pais na kabes di un forsa multinashonal pa apoyá polis haitiano, a referí na e nombramentu komo “un paso importante” pa e pais.