WILLEMSTAD.- Sambil tambe ta partisipá aktivamente den nos siman di kultura ku diferente aktividat. Kanto, baile, kos di boka dushi pero tambe tayernan edukativo.
Ayera djárason, 25 di sèptèmber a toka turno na e promé tayer di marament’i lensu organisá pa Sambil huntu ku ‘Krea HeadWrap’.
“Sin duda e marament’i lensu aki a kuminsá for di hopi tempu pasá. Kada manera di mara lensu ku su nifikashon, estilo i okashon, te ku nos a adoptá esaki i hasié parti di nos kultura! Unu ta pasa e konosementu pa otro. Awendia asta a inkorporá e estilo moderno den marament’i lensu te ku esaki a bira parti di moda pero sin lubidá fo’i unda el a bini”, asina Najhilah i Cenaida van Dinter a splika durante e tayer.
Tur ku a partisipá a keda gabá kon bon esaki tabata i tabata kontentu ku nan mes por a krea nan modèlnan bunita ku nan lensu. Di e manera aki Sambil kier kontribuí na e konosementu di e pueblo di Kòrsou.
Danki na tur ku a partisipá i p’esnan ku a keda afó e biaha aki, keda pendiente pa e próksimo tayer di marament’i lensu ku ‘Krea Headwrap’.
Sambil mas ku un sentro komersial, ta e sentro kaminda bo por kumpra, gosa i eksperensia momentu nan inolvidabel!.