WILLEMSTAD.- EXTRA a dal den un promoshon impagabel ku tabatin ayera pa Kòrsou den e korant grandi di Chicago, Chicago Tribune. E artíkulo ta aparesé den e sekshon di Life & Style Travel i ta skirbí pa  Andrea Guthmann.
E artíkulo ta pasa revista na e mihó karnavalnan di nos área i ta ilustrá ku algun portrèt di tantu sitionan renombrá na Kòrsou komo di karnaval di nos isla. E portada ta di karnaval di Kòrsou. E artíkulo ta bisa ku ta un periodo kaminda bo no tin tapa bo inhibishonnan. Meskos ku e konosido Mardi Gras na Merka, karnaval ta tradishonalmente e último chèns pa ekseso promé ku periodo di kuaresma drenta ku ta tradishonal serka katólikonan. Ta hasi komparashon ku entre otro e karnaval di Rio de Janeiro (Brasil). Karnaval ta e kos di Karibe ku ta un destinashon, kontrali na loke hopi merikano ta kere, hopi variá. Kada isla di Caribe tin su mes historia, kushina i kultura i tambe nan mes karnaval. Riba algun isla e evento ta mará na tradishonnan katóliko. Den otronan ta konmemorá emansipashon di sklabitut i tambe aspektonan di kosecha. Algun di e selebrashonnan ta den febrüari, otronan mas lat den aña pero tur tin un aspekto komun: bo por fiesta manera ta un hende lokal bo ta, asina e artíkulo ta bisa.
Kòrsou ta menshoná komo promé destinashon i ta bisa ku e periodo importante ta di 26 pa 28 di febrüari. E ritmo di tumba afrikano ta bati den aire di un karnaval ku ta yen di bida pero no riská manera riba e otro islanan. Ta un karnaval kaminda bo por bai ku bo yunan. E paradanan ta algu grandi ku gruponan den kayanan di Willemstad ku un kapital ku ta un portrèt asina perfekto ku bo ta kere ku bo a yega na un sèt pa traha pelíkula di un isla karibense ku no ta eksistí mas. E artíkulo ta menshoná dos espasio pa gosa di e festividatnan komo turista ku ta na Carnival Dome na kuminsamentu di e ruta òf e tribuna di karnaval kasi na final. Tur dos tin bon lugá di sinta, kuminda i ko'i bebe.
Segun e artíkulo, Kòrsou tin komo punto di salida ku tur hende ta gosa di e aktividat. Ademas Kòrsou ta konsiderá un di e destinashonnan mas amistoso pa e grupo di "gay" i tin hotèlnan ku ta hospedá e gruponan aki. "Nos komunidat ku ta un meskla di tur parti di mundu a krea un filosofia progresivo di "bida i laga biba" ku ta yama bonbiní na e komunidat LGBT, asina André Rojer ta bisa di Ofisina di Turismo di Kurso (CTB) ta bisa den e artíkulo. E artíkulo ta duna diferente rekomendashon kaminda por hospedá i ta menshoná entre otro Kura Ulanda ku ta parti di e herensia kultural mundial di Unesco. Otro destinashonnan ku e artíkulo ta menshoná ta Trinidad, St. Lucia i Barbados.