WILLEMSTAD.- Despues di a skucha tur komentario ayera ‘DEN E BEMBE’ ta bou dje opinion ku pa ‘Tumba Revival Festival’ por tuma lugá mester traha riba un protokòl di produkshon dje evento kaminda ta pone regla pa tur persona ku ta partisipá den e produkshon.

Konosiendo kon grandi e produkshon di Festival di Tumba sa ta, nos ta kere ku lo tin den kareda di 100 persona embolbí den e evento, anto esaki ta un kalkulo. Tumando na konsiderashon ku e orkesta mes lo hasi uso di mas músiko, ta pone ku e grupo por ta algu mas ku 100.

STAGE

E stage ta simpel i ta garantisá distansia entre e músikonan. E kambio di músikonan ta bai pone ku mester regla esaki di tal manera ku ta minimalisá e kontakto/ distansia sosial.

PROTOKOL

E protokòl mester sirbi pa kombens’é e tim di krísis ku no tin peliger, ‘Super Spread Event’, pa e evento. E tim di produkshon oudiovisual mester keda separá for di e músikonan i tur sobra persona ku ta permití pa ta den Festival Center mester kumpli ku e reglanan dje protokòl.

Pa por logra kombens’é Gobièrnu, mester produsí e protokòl aki manera nan sa bisa na ingles, as soon as possible, pa garantisá ku a tene kuenta ku tur detaye.

AMAK awe mainta lo bai tin e trabou pa intermediá pa yega na un solushon pa e evento por tuma lugá.

‘DEN E BEMBE’ ta kere ku si por yega ku ta solamente 1 PCR tèst mester wòrdu hasi i ku tin un protokòl riba mesa, lo por logra yega na un solushon.

Sin un protokòl di produkshon dje evento, ta bai bira masha difísil, paso tin yen otro sitio di evento ku ta sinta warda pa Gobièrnu laga un evento tuma lugá sin regla, pa nan tambe hasi uso dje oportunidat pa organisá nan evento, ounke kada evento ta keda evaluá riba nan kurpa.