WILLEMSTAD.- Pueblo di Kòrsou ta biba ku selekshon nashonal di futbòl. Riba esei no por tin duda! Bastante hende ayera nochi den Parke Wilhelmina kaminda tabatin un ‘meet and greet’ ku e selekshon di Kòrsou ku mañan atardi 6 or lo enfrentá Haiti den Stadion Ergilio Hato.

E ambiente di Punda Vibes tabata fenomenal. Hopi t’esnan ku a probechá saka potrèt ku e hungadónan kendenan sigur a disfrutá dje atenshon ku nan a haña.

Promé Minister sr. Eugene Rhuggenaath i tambe flamante Minister sra. Gisella Mc William tabata presente i a dirigí nan mes na tantu e selekshon di Kòrsou komo tambe na e públiko. A asentuá e importansia pa sostené e selekshon ku sigur a bin ta hasi bon trabou, trahando duru riba kaminda pa yega Kopa Mundial di Qatar.

Ta spera ku mañan delaster un asiento na SDK lo ta okupá. Tur kos ta indiká ku lo tin un yeno kompleto.

...Minister sra. Giselle Mc William a hasi su debut komo mandatario den deporte...

Hei yu di Kòrsou, bisti na blou!

Kòrda bai ku bo bandera

*Nos a tuma nota riba un yamada ku a sirkulá ayera pa tur nos hendenan basha bai stadion mañan atardi na blou, ku ta koló di nos bandera i di selekshon nashonal. Meskos ku fanátikonan di Brazil ta bai stadion na hel, esnan di Hulanda na oraño i Alemania na blanku, ta bon pa bira un kustumber ku nos ta kompañá nos selekshon ku e koló di nos bandera.

Pa esnan ku ta deseá, por akudí na ofisina di FFK (tras di SDK) pa kumpra suèter i demas asesorio di selekshon di Kòrsou. Un petishon na esnan ku no logra esei, pa bai bisti na paña blou.

Pakiko no bai ku nos bandera tambe? Sòru di tin bandera di Kòrsou den man pa zuai durante di wega.