WILLEMSTAD.- Vários trabou balioso a bin ta tuma lugá relashoná ku e echo ku e aña’ki ta kumpli 100 aniversario di futbòl organisá aki na Kòrsou. No mas ku 23 di mei último tabatin un selebrashon eukarístiko den basílika di Sta. Ana. Un dje inisiativanan balioso den kuadro dje selebrashon ta un kampaña ku ta duna oportunidat na komunidat di Kòrsou –fanátikonan di futbòl lokal- pa skohe su “Onsena di Siglo”.

Direktiva di Federashon Futbòl Kòrsou (FFK) a skohe pa laga traha un buki ku ta kontené un diversidat na artíkulonan di pasado ku kada un ta tira un bista diferente i históriko riba e lucha pa desaroyo i progreso di klupnan, futbolista-, árbitro-, direktornan tékniko i otro organisashonnan ku a sostené e deporte di futbòl durante di shen aña largu. Hopi ta e héroenan i klupnan ku lo haña e atenshon ku nan meresé.

E buki lo ta kla aki un par di luna i lo ta dediká na e pioneronan, na tur nivel i den tur skina, ku a yuda pa futbòl di Kòrsou por a krese. E lo sirbi tambe pa eduká generashonnan di presente i futuro.

Komo parti di e homenahe, a instalá un komishon ku a traha riba un lista di “100 Mihó Futbolistanan” di Kòrsou. E komishon a keda enkabesá pa dr. Valdemar Marcha, huntu ku srs. Franklin Clemencia, Ronny Trouwloon, Mem Vornis, Rignald Vidal i Chito Wallé. Mas ku un aña largu miembronan di e komishon a reuní tur djárason ku eksperto- i veteranonan pa evaluá futbolistanan ku nos selekshonnan konosé. Miéntras tantu e trabou dje komishon ta konosí.

Pueblo su Onsena di Siglo

E siguiente paso ta ku awor mester yega na un Pueblo su Onsena di Siglo, ku tambe mester aparesé den e buki. E onsena aki ta keda formá pa pueblo di Kòrsou. Tur hende ta liber pa partisipá, yenando e formulario athunto i depositá e formulario na EXTRA. Lokual mester hasi, ta yena e 11 futbolistanan ku e partisipante ta haña ku mester forma parti di Pueblo su Onsena di Siglo.

Mester yega na: Mihó kiper, 4 mihó defensornan, 3 mihó bolantenan (mediokampista), 3 mihó delanteronan.

For di tur e reakshonnan, e komishon lo saka Pueblo su Onsena di Siglo ku tambe lo keda publiká den e buki.

Ta enkurashá un i tur pa partisipá dor di yena e formulario athunto i depositá esaki na EXTRA pa mas tardá djasabra 12 di yüni 2021.