WILLEMSTAD.- Ayera nochi nos sentro di siudat Punda a konosé apertura di un e establesimentu ku ta primintí di trese bida atrobe den Punda. Ta trata aki di Kuba Libre Restaurant Café Bar.
Un konsepto di kubano kaminda e kliente semper ta disfrutá di e ambiente latino kubano ku platonan ekskisito típiko i internashonalmente rekonosí for di e menú dje kushina kubano.
E famoso kòktelnan kubano no por keda afó huntu ku e kòktelnan Internashonal.
Pues na Kuba Libre e famoso bibidanan: “Cuba Libre”, e Mojito, e Cuanito, e Saoco y Jengibre i otronan lo no por falta. Naturalmente bo kòktel faborito tambe Kuba Libre tin pa ofresé bu.

Músika
Músika ta e loke a hasi e pais Cuba asina popular. Músika ta kore den sanger di kubanonan, anto ora bo drenta den un establesimentu manera Kuba Libre, lo bo sinti e kalor kubano atraves di e músika kubano latino pasobra simplemente músika lo tin un lugá importante den Kuba Libre.
Lo bai tin presentashon di banda i artistanan presentando bibu riba sierto dianan den siman.

Konsepto
E idea a bini despues ku e propietarionan a para ketu na e echo ku aki na Kòrsou no tin un sitio ku e karakterístikanan aki pa ofresé un tiki di Cuba na turistanan i tambe nos pueblo
Si bo ke bini ku bo famia o grupo òf bo tin un selebrashon o reunion,  Kuba Libre ta disponé di un espasio privá i airekondishoná pa bo disfrutá di bo enkuentro trankil i miéntras bo ta biba e ambiente i gastronomia kubano.
Pa loke ta trata parkeo, ta konosí ku anochi no mester paga pa parker i den henter a kaya aki i den serkania tin hopi espasio pa stashoná outo.
For di awe pueblo di Kòrsou ta keda kordialmente invitá pa bin sera konosí ku un establesimentu bunita, espasioso, diferente.

Dikon Kuba libre ku K?
Pa duna e toke krioyo kurasoleño, gerensia a opta pa yama e establesimentu Kuba Libre skirbí ku K i no un C
Ban rebibá e ambiente di ántes den nos Sentro di siudat, ban biba Punda bèk. Punda ta di nos.