DEN HAAG (AFP).- Fiskal di Korte Penal Internashonal a solisitá órden di detenshon kontra e prinsipal dirigentenan di Israel i dje movementu palestino Hamas pa su puesto den e krímennan di guera kometé durante i despues di 7 di òktober.
E siguiente ta e puntonan klave dje akusashon di parti di e fiskal Karim Khan kontra di tur dos:
HAMAS:
E akusashonnan ta den direkshon dje lider di Hamas den Gaza, Yahya Sinwar, e hefe di brigadanan Ezedin al Qasam, e brasa militar di Hamas, Mohamed Al Masri, mihó konosí komo “al Deif” i e lider di büró polítiko dje movementu palestino, Ismail Haniyeh, ku ta biba na Qatar.
E fiskal a menshoná e “toma di rehennan” komo krímen di guera i e “trato kruel” i ultrahe kontra dignidat di persona ku nan a sekuestrá. Tambe ta señalá komo krímen kontra di humanidat, “e asesinato, violashon i otro formanan di violensia seksual”, tortura i otro aktonan inhumano.
Khan ta akusá e tres dirigentenan di Hamas di ta “responsabel for di punto di bista penal dje asesinato di algun shen sivil israelí durante e atakenan kometé pa Hamas i otro gruponan armá dia 7 di òktober di 2023 i e echo ku a kue 245 persona komo rehen.
Mas aleu e fiskal ta bisa ku “tin motibunan rasonabel pa kere ku e rehennan sekuestrá den Israel a keda retené bou di kondishonnan inhumano i ku algun di nan a sufri violensia seksual” i a hasi yamada pa “liberashon inmediato di esnan sekuestrá”.
ISRAEL:
E fiskal a solisitá Korte pa emití órden di aresto kontra e promé minister israelí, Benjamin Netanyahu, i e minister di defensa israelí, Yoav Gallant.
Entre e supuesto krímennan di guera, Khan a menshoná “deliberadamente laga sivilnan muri di hamber”, provoká konsientemente hopi sufrimentu òf atentá gravemente kontra di integridat físiko i di salú, “homisidio intenshoná” i di a dirigí di forma intenshonal atake kontra e poblashon sivil.
Entre e akusashonnan di krímen kontra di humanidat, e fiskal a referí na asesinato, inkluso morto provoká pa hamber, persekushon i otro aktonan inhumano.
“E krímennan kontra di humanidat menshoná ta forma parti di un atake generalisá i sistemátiko kontra e poblashon sivil palestino den kumplimentu di e polítika di un organisashon.
Khan a indiká a base di pruebanan ku “Israel di forma intenshonal i sistemátiko a priva e poblashon sivil di hinter Gaza pa yega na medionan pa nan por sobrebibí. Pa argumentá e akusashon aki, el a referí na atake kontra di sivilnan, inkluso personanan pará den fila pa por haña kuminda, tambe pa a stroba yudansa pa yega i “e atakenan i asesinato di trahadónan humanitario”.
“E aktonan aki a keda kometé den kuadro di un plan pa usa hamber komo un método di guera”, segun Khan.
