BURGENSTOCK, REP. CHEKA (AFP).- Alrededor di 80 pais ayera na Suisa a akordá ku e diálogo “entre tur esnan envolví” i e rèspèt di e integridat teritorial di Ukrania ta e kaminda pa sigui pa pone fin na e guera den e pais. Guera ku a start mas di dos aña pasá ku e invashon ruso den e pais.
Gran mayoria di e 90 paisnan representá den e kumbre di Burgenstock a duna nan apoyo na e deklarashon final, den kua tambe ta pidi e regreso di míles di muchanan ukraniano deportá pa Rusia, komo tambe e interkambio di prezunan di guera.
Sin embargo, ni Rusia komo tampoko China tabata representá den e reunion i e komunikado no a risibí e aprobashon di paisnan manera Brasil, India, Arabia Saudita i Emiratonan Arabe Uní.
E siguiente ta e prinsipal puntonan dje komunikado final:
Un guera ruso:
Ta konsiderá ku Rusia t’e responsabel pa a start e guera kontra di Ukrania den febrüari di 2022, ku konsekuensia devastador, i komo tal ta pidi pa pone un fin na e guera mediante un solushon global.
“E guera aktual di federashon di Rusia kontra Ukrania ta sigui provoká sufrimentu humano i destrukshon na gran eskala, komo tambe riesgo i krísis di reperkushonnan global”, segun e teksto ta indiká.
Integridat teritorial:
E paisnan firmante “ta reafirmá nan apoyo na prinsipionan di soberania, di independensia i di integridat teritorial di tur Estado, inkluso di Ukrania, den fronteranan internashonal rekonosé”.
Rusia ta kontrolá aktualmente komo 20% dje teritorio ukraniano, inkluso e península di Crimea, aneksá den 2005.
Mucha i prezunan:
E dokumento ademas ta hasi un yamada pa interkambio kompleto di prezunan di guera i pa e regreso na Ukrania di míles di mucha deportá pa Rusia i pa teritorionan ku e pais aki ta kontrolá.
Kiev a akusá Mòsku di a hiba den kareda di 20.000 mucha for di inisio di e invashon. Kremlin su reakshon ta ku a desplasá e muchanan komo un manera pa protehá nan kontra dje guera.
“Tur e prezunan di guera mester keda liberá mediante un interkambio kompleto”, segun e komunikado final.
Seguridat nuklear:
E kumbre ta reklamá ku Ukrania mester rekuperá e kontròl “pleno i soberano” dje sentral nuklear di Zaporiya, esun mas grandi di Europa, ku aktualmente ta bou di kontròl ruso.
Organisashon Internashonal di Energia Atómiko (OIEA) a atvertí na vários okashon dje riesgo di un aksidente nuklear enorme for di despues ku militarnan ruso a okupá e sentral na prinsipio dje guera.
Inkluí Rusia:
E teksto ta sugirí pa inkluí Rusia den futuro deklarashonnan riba un plan di pas. “Nos ta konvensí ku pa logra pas, mester di presensia i diálogo di tur e partinan”, segun e firmantenan.
