MOSKU, RUSIA (AFP).- E presidente ruso, Vladimir Putin, kende awe lo biaha pa Nort Korea pa un bishita di estado “amistoso”, a sigurá ku Pyongyang ta “apoyá firmemente” e kampaña militar di Mòsku den Ukrania, segun un artíkulo publiká pa e agensia ofisial KCNA.
E bishita di Putin ta tuma lugá na momento ku den Oksidente nan ta akusá Nort Korea di ta suministrá arma na Mòsku pa esaki su ofensiva den Ukrania.
“Nos ta apoyá e echo ku RPDC (Nort Korea) ta sostené firmemente e operashon militar di Rusia den Ukrania”, segun Putin a skirbi, promé ku su biahe pa Pyongyang.
E asesor diplomátiko di Putin, Yuri Ushakov, a presentá e biahe komo un evento importante pa tur dos pais, gòlpiá pa sanshonnan oksidental. Ushakov a menshoná e ”posibel” firmamentu di un “akuerdo di koperashon stratégiko global”, ku lo ta un vershon aktualisá di un tratado firmá durante e kultismo bishita di Putin na e pais, den 2000.
Putin tambe a ekspresá den e artíkulo ku su pais “lo apoyá Pyongyang konstantemente den futuro”.
“Rusia a apoyá Nort Korea i su pueblo heroiko den su lucha pa defendé su derechi pa eligí pa su mes e kaminda di independensia, e originalidat i e desaroyo den e enfrentamentu ku e enemigu peligroso i agresivo i nos lo apoy’é konstantemente den futuro”, segun Putin.
E pais asiátiko ku armanan nuklear ta mantené un estado di enfrentamentu ku su bisiña Sur Korea, pero tambe ku Merka.
E sekretario general di OTAN, Jens Stoltenberg, a duna di konosé ku e bishita di Putin ta mustra e nesesidat grandi di parti di Rusia pa por konta ku lidernan outoritario pa e por sigui ku su ofensiva den Ukrania.
“E ta demostrá kon dependiente presidente Putin, i Mòsku, ta di paisnan outoritario di rònt mundu”, segun Stoltenberg.
Potensianan oksidental ya pa lunanan ta akusá e norkoreanonan di ta entregá munishon na Rusia pa su ofensiva kontra di Ukrania, a kambio di asistensia teknológiko i diplomátiko.
White House a bisa ku Merka ta “preokupá pa e aserkamentu entre Rusia i Nort Korea”. E biahe no ta preokupá nos. Loke si ta preokupá nos ta e profundisashon di e relashon entre e dos paisnan”, segun e bosero di Konseho di Seguridat Nashonal, John Kirby.
