ST. PETERSBURG (AFP).- Presidente ruso, Vladimir Putin, ayera a referí na e problemanan legal di Donald Trump, kondená pa delitonan penal, komo “un lucha polítiko interno” entre demokrat i republikanonan promé ku elekshonnan presidensial norteamerikano di novèmber benidero.
“Ta opvio pa rònt mundu ku e proseso di Trump pa kosnan ku a tuma lugá algun aña pasá, sin prueba dirèkt, ta un manera pa usa e sistema hudisial den un lucha polítiko interno”, segun Putin den un entrevista na St. Petersburg ku representantenan di medionan di komunikashon estranhero.
E eks-mandatario republikano, ku ta aspirá pa regresá White House, siman pasá e keda deklará kulpabel di falsifikashon di registronan empresarial pa tapa un skandal seksual den e último parti dje kampaña presidensial di 2016. Lo pronunsiá su sentensia dia 11 di yüli.
Putin a konsiderá komo “ridíkulo” pa bisa ku Trump, kende na algun okashon a manifestá atmirashon pa e mandatario ruso, ta un kandidato mas aseptá pa Mòsku kompará ku su rival, e presidente saliente Joe Biden.
“Nos no ta kere ku despues dje elekshonnan lo tin kambio respekto Rusia i e polítika norteamerikano”, segun el a deklará.
“En general, pa nos no tin ningun diferensia” entre Biden i Trump, segun el a sigurá.
