WILLEMSTAD.- Ayera tardi e organisashon Qube a tene un rueda di prensa pa informá dje konsierto di Ilan Chester dia 30 di novèmber próksimo
Ilan Chester lo ta na Kòrsou pa presentá su ‘Solo Exitos Tour’, un ora i mei di su éksitonan di mas grandi.
Konosí komo un dje músikonan Venezolano renombrá i kerí rònt Latino Amérika, e kantante, kompositor i produktor musikal, Ilan Chester den dékada 80 i 90 a marka pouta i pa esaki a risibí un Latin Grammy pa su ekselensia musikal.
Ku éksitonan manera ‘Solo Faltas Tú’, ‘Soledad’, ‘No es Corazón’, i ‘Canto al Ávila’, kansion dediká na e parke Nashonal i e seru Ávila na Caracas, Ilan a produsí kansionnan ku a aparesé komo tema musikal di diferente novela, miéntras ku otronan a bira klásikonan di e historia musikal venezolano.
Ken no ta kòrda na 2016 na momentu ku Ilan Chester na último ora a remplasá Burt Bacharach i a pèrkurá pa e sala di eksibishon di WTC bira chikí, debí na e kantidat di públiko ku a yena esaki pa disfrutá di su presentashon.

PRESHOW
Pa e konsierto di dia 30 di novèmber próksimo un orkesta bou di direkshon di Angelo ‘Borrel’ Dopwell – ‘Dopwell All Star Orchestra’ lo kompañá vários artista lokal manera entre otro Dibo D, Yentje Silvanie, Rachel Felida, Tito Doran, Giltaly Doran, Ebony Albertus, Dan Dan de Jongh, Url Isenia, Sushena Bishop, Heinrich ‘Richie Rich’ Pieter i Gigi Clotilda.
Den 1 ora di show nan lo repasá dékada 80 interpretando vários dje éksitonan grandi dje temporada ei.
Karchinan pa e konsierto ta optenibel entrante awe na Mensing’s Caminada i na Van den Tweel Supermarket. Lo tin un sekshon general i un sekshon VIP. Pa mas informashon por yama Qube na 525-6999.