MERKA.-  E leyenda musikal, Quincy Jones a ser otorgá  e montante di 9.4 mion dòler ayera, esaki despues di un disputa largu ku e grupo ku ta atendé e herensia di Michael Jackson, esaki relashoná ku pago di derechi di outor.
E pago di derechi i tambe pago di produkshon musikal ta bin di algun dje éksitonan di mas grandi di Jackson manera ‘Billie Jean’ i ‘Thriller’.
Jones, 84 aña, a reklamá tambe ku no a page muchu tiki pa muzik ku a keda usa den e dokumental di Jackson ‘This is It’, igual ku dos show di ‘Cirque du Soleil’.
E produktor a buska primeramente 30 mion dòler pa e kaso ku el a entamá for di 4 aña pasa, e representantenan di Michael Jackson a pone 392 mil dòler komo pago segun nan kalkulashon pa e demanda di Jones.
‘Komo un artista, mantené e vishon i integridat di e kreashon di un hende ta masha importante. Ami, huntu ku e tim ku ami i Michael a hinka den otro, a dediká hopi pa krea e albùm aki i semper el a duna mi un sentido amplio di orguyo ku ounke tres dékada a pasa ku e grabashonnan a tuma lugá, ainda e kansionnan aki ta keda toka den tur skina di mundu’, asina Jones a deklará den un komunikado.