MERKA.-  Ayera djaluna, R. Kelly a lansa un kansion nobo kaminda abiertamente e ta reakshoná riba tur e akusashonnan di kondukta seksual inadekuá den su kontra.
E kansion ku tin un durashon di 19 minüt titulá ‘I Admit’, e kantante ta kanta ku el a kometé algun fayo, pero mesora ta ninga tur akusashon.
Pa algun aña kaba Robert Kelly, manera e kantante su nòmber kompletu ta, ta keda relashoná ku kondukta seksual no adekuá i ku e tin un sekta seksual den su kasnan na Atlanta i Chicago.
Einan e kantante lo tin diferente muhé bou di su kustodia kaminda e ta disidí ki ora nan por kome, baña i ki ora nan por sali pafó. Ta keda bisá tambe ku e ta filma ora e ta tene relashon seksual ku nan i ku lo e mester a kita nan telefòn selular.
E músiko di 51 aña na diferente okashon den pasado a keda akusá di aktonan kontra moral.
Den e kansion Kelly ta duna su preferensia na muhénan hóben. ‘Mi ta tene relashon ku tur tipo di muhé, tantu bieu komo yòn. Pero no yamá mi un pedofil, pasó esei ta ridíkulo’, asina Kelly a bisa.‘Bo por tin bo opinion, pero ami mester bai prizòn pa bo opinion? Ban, dal mi, pone mundu kontra di mi, pero solamente Dios por silensiá mi’, Kelly ta kanta.
Kelly ta komentá tambe riba su presunto sekta seksual. E ta yama e akusashonnan apsurdo.