NEW YORK, MERKA.- E kantante R. Kelly a desmentí e akusashonnan ku e lo tin 6 dama komo katibu i ku e lo tin kontrol riba tur nan aspektonan di bida.
Kelly di 50 aña a deklará di ta ‘alarmá i perturbá’ pa e akusashon ku a keda presentá pa e portal ‘Buzzfeed’, segun su abogado Linda Mensch.
‘Kelly ta desmentí firmemente e akusashonnan i ta demandá enérgikamente esnan ku a akus’é pa limpia su nòmber’, asina a keda afirmá den un komunikado.
Segun ‘Buzzfeed News’ a afirmá djaluna último ku e 6 muhénan ta biba den un kas serka di Atlanta i den un studio na Chicago i ku nan ta bou di kontrol total di R. Kelly kende ta disidí kiko nan ta kome i e paña ku nan por bisti. Segun e portal, Kelly tin relashon seksual ku e 6 damanan.
Segun e mesun ‘Buzzfeed’ e damanan ta keda influensiá pa e kantante manera un lider tin riba su sekta. R. Kelly ta un maestro den kontrol mental, asina e portal a afirmá.
Tata di un dje damanan a hasi denunsia riba e situashon, pero e polisnan ku a investigá e kaso no a tuma niun medida kontra di e kantante, konsiderando e kaso komo un di relashon entre dos persona mayor di edat.
No ta promé biaha ku R. Kelly ta den un polémika. Na 2008 e korant Chicago Sun-Times a akusá e kantante di tin relashon seksual ku un menor di edat, pero e kantante a keda apsolvé di tur kulpa dor di hustisia.