WILLEMSTAD.- Radio Hoyer konosí  komo e pionero i  lider den radio difushon, esta ku músika, programanan variá, programanan lokal, internashonal i deporte, ta selebrá djadumingu awor dia 10 di mart total 125 aña. Esaki repartí entre e dos emisoranan Radio Hoyer i i 2. Radio Hoyer ta e úniko radio ku ta transmití riba energia solar.  Radio Hoyer 1, ku for di 1954 ta transmití na papiamentu ta selebrá 65 aña. E emisora ruman Radio Hoyer 2, ku ta transmití na ulandes ta selebrá 60 aña di eksistensia.  Tur oyente i Kòrsou den su totalidat ta invitá i ta bon biní pa bin selebrá na Hòfi Fidel na Sta. Catharina.
Djadumingu awor dia 10 di mart e selebrashon ta inisiá ku un santu sakrifisio di misa na misa di Montaña di  8.30 or pa 9.30 or. Despues di misa ta warda tur hende na Hòfi Fidel for di 10.00 or di mainta te 19.00 or di anochi pa presensia i selebrá huntu ku e famia di Radio Hoyer.
Tin músika bibu entre otro di e banda hóben D- Edgde i tambe Orkesta Karimbo. Lo bai tin pa esnan ku stima nan pida kaha di músika i mirando ku ta aña di kaha di òrgel esaki no por keda afó. Grupo Rítmiko Oriri tambe lo toka meskos ku Típiko Pasa Bon. Pa e muchanan Tio Ali tei entretené den oranan di mainta. Naturalmente e diferente lokutor i DJnan di e radio tambe ta presente i lo transmití henter dia ‘live’ for di Hòfi Fidel.
Ta mas ku lógiko pa bisa ku tin stèntnan di kuminda i un bar bon surtí. Pa mas informashon por subi e facebook di Radio Hoyer riba: www.facebook.com/RadioHoyerCuracao/

Un tiki historia di Radio Hoyer
Radio Hoyer a keda fundá na aña 1954 dor di Horacio Erasmo Hoyer q.e.p.d. mihó konosí komo    "Yacho" Hoyer. Yacho no tabata solamente konosí komo un músiko pero e tabata un tremendo deportista.
Pa algun aña e tabata kampion den e deporte di tènis i a gana diferente trofeo i a risibí vários rekonosementu i elogio pa su prestashonnan. Komo deportista tabata mas ku lógiko ku el a habri su establesimentu di deporte di kua el a transformá den un studio di grabashon. E fanátiko di músika aki tabata stima toka kitara i kuarto. Bou di e seyo Hoyco el a sa di inmortalisá músika i kanto di  vários músiko i bandanan. Tabata den e periodo ei ku Yacho a sinti ku hendenan kier a skucha un radio lokal i a lanta e radio.
Radio Hoyer 1 tabata e promé emisora ku a transmití na papiamentu. Horacio Hoyer tabata konvensí ku e momentu ei tabata e momentu pa dal e stap pa promové e kultura lokal di Kòrsou. Sinku aña despues el a ekspandé su alanan i aki e radio nobo di e tempu ei Radio Hoyer 2 a kuminsá dia 10 di mart 1959 ku transmishon na ulandes.
Radio Hoyer a skibi historia dor di tabata e promé emisora komersial na mundu ku tabata transmití riba e frekuensia di FM i total riba energia solar.  For di inisio di e radio, Radio Hoyer tabata transmití reunionnan di parlamento Antiano i di Konseho Insular di Kòrsou riba 1010 am i 1500 am. Awor aki Radio Hoyer 1 ta transmití su programashonnan riba e frekuensia di 101.9 fm i  Radio Hoyer 2 riba e frekuensia di fm 105.1.