WILLEMSTAD- Djasabra 8 di sèptèmber 2022 den oranan di mainta a surgi e partisipashon tristu ku Rafael Fernando Jozefa, mihó konosí komo Raffy, a bai sosegá. Sin duda un eks-pelotero ku a figurá entre e mihó 5-nan den historia di Beisbòl na Korsou, Aruba, Antia i region. EXTRA ta bai reprodusí un entrevista profundo ku Jeffrey Martina a sostené ku Raffy na febrüari 2002.

RAFFY

Rafael Fernando Jozefa a nase na Aruba dia 1e di mart 1950. Raffy, manera nan ta yam’e ta kasá ku Mayris Jozefa- Zimmerman i tin dos yu, Michèlle i Rafael.

Raffy a splika nos ku su kasa i su yu muhe nunka no a hasi deporte, mientras e yu homber Rafael a sigui pasonan di su tata. El a hunga beisbòl for di den Liga Vruminga i yega te Dòbel A.

KOMIENSO

“M’ a kuminsá hunga beisbòl ofishal ku 11 aña den un ekipo ku yama US Cats na Aruba, e tempu ei ku Webster i Elias Kock. Mi a hunga ku un reportero hopi konosí na Aruba ku ta Kadochi Kock. Nos a hunga beisbòl den mesun tim na Aruba. Despues m’a pasa pa Super Cleaning. Asina ei mi a hunga mi dos añanan den beisbòl Senior League tambe. Di Senior League mi a sali bai A-klas siendo mi por a hunga un aña den Senior League ainda. Den e aña ei mi tabata ya kaba ku 15 aña den e pre-selekshon di Dòbel A. Mi a kai afó si ora mester a forma e tim. Mi tabata e úniko mucha den e tim.

“M’a hunga dos aña den A klas ku e tim di Heineken. Despues tres aña Dòbel A ku Heineken te ku aña 1969. Mi ta orguyuso di por bisa ku mi a hunga den e promé ekipo di Aruba ku a gana Kopa Antiano, esei tabata na aña 1967.

Mi a kuminsá hunga outfield i despues mi a bai primera. Na Kòrsou m’a kuminsá den outfield ku Bridgestone i tabata despues ku m’a pasa pa primera. Ei nan a duna mi e apodo “Stofzuiger”. E hende ku a yuda mi hopi den e kos ei tabata Harold Koeiman. Ora nos kaba di kalentá e tabata tira pikonaso di distansia kòrtiku p’ami i mi tabata kue, kue, kue pikonaso i despues m’a  kuminsá dominá e hugada ei. Mi a keda trein apesar ku mi tabata dominá e kos ei. Andres Jones tambe tabata tira algun bala p’ami. M’a keda train e e kos ei te dia m’a stòp di hunga. E kos ei ta training, training i mas training.

“M’a hunga vòli, basket i sòftbòl. Vòli na nivel di selekshon di Aruba. For di na skol mi a hunga vòli. Mi a hunga den e ekipo di Don Bosco huntu ku rumannan Leisner i rumannan Jones (Steve i Junny ruman di Andres Jones, tata di Andruw).

“Mi a biba na Aruba te ku aña 1970. M’a bin Kòrsou via Marcel Brigida. Dor ku ami ku ne tabata hunga den selekshon di beisbòl. Na Kòrsou Marcel a bisa mi ai train ku nan, pero mi no tabatin wante, sapatu di bala ets. Atardi promé ku Marcel bin buska mi ya Wilfirdo Valeriaan tabata na mi kas. M’a bai train ku nan, nan a papia ku mi. “Nan a bisa pa mi keda, pero mi kontesta tabata ku mi mester papia ku mi mama promé. “M’a yama mi mama i el a bisa ku t’ami mester sa. E ora ei m’a a bai Aruba i bini bèk pa keda. Dia mi a bin Kòrsou mi a legumai vòli, basket i sòftbòl i a sigui den beisbòl ku Bridgestone ku despues a bira Royal Scorpions. Pero e team promé tabata Firestone i despues a Bridgestone, Kentucky Fried Chicken i por ultimo Royal Scorpions Mr. Baseball.

Raffy na momento di risibi for di Chicho Jesurun (dfm) un di su hopi kopanan, sea komo kampion ku Royal Scorpions of komo lider honronero i di kareda empuhá.

SIFRANAN

Raffy Josefa a sali kampion bate na 9 okashon den dòbel A den e mas o ménos 18 pa 19 aña ku e super pelotero a hunga aki na Korsou. Na 5 okashon Raffy Josefa a gana tripel korona un ta un hazaña inkreibel. E lideratonan den homerun Raffy no ta kòrda.

Raffy: “Mi no ta kòrda kuantu biaha mi a sali kampion homerun. Segun mi ta mas ku 9 sí, mas biaha ku m’a sali kampion bate. “Spit tambe mi tabatin, mi tabata roba base tambe. Dia mi a bin for di Aruba mi ta dal un rolling den kuadro kore yega safe na primera, komo infielder bo no ta saka mi out fásil. 1975 bin ariba mi pia a kibra i for di e dia ei mi a keda hunga ku doló stret. Mi ta subi vèlt hunga i niun hende sa ku mi tabatin doló. Mi a sigui train normal.”

ROYAL SCORPIONS

Promé aña di Raffy na Kòrsou ku e ekipo di Ford nan no a bira kampion. Blue Hawks a bira kampion e aña ei. “Nos a bira kampion 71, 72, 73 i 1974, miéntras den ’75 nos a bira sup kampion. E aña ku nos a bira kampion atrobe tabata 1979. Semper nos tabata entre kampion i sup kampion. 1980 nos a hunga un par di wega den Stadion di Rif despues nos a bai Sentro Deportivo Kòrsou.

Mi ta kòrda play-off final 1979 kaminda nos tabata atras den e serie 2-0 ku chèns di pèrdè e seri 3-0. Chape Bernardus ta dal un ròllin pa short ku Richenel Daal ta pifia riba dje... ayo Wild Cats. Einan nos ta krese i gana 3 wega stret pa bira kampion ku Keller den nos tim.

E dia si m’a spanta pasobra mi no por a imaginá mi ku Scorpions tabatin dje tantu fanátiko ei. Un fanátiko te den e mastnan di lus ariba aya ku un bandera ku Jones skibi riba dje. Hopi great e aña ei. Andres Jones tabata den forma. Pa mi e mihó pelotero di tur tempu na Antia. Mi konosé Andres hopi tempu nos a lanta huntu den San Nicolaas. E ta un par di aña mas grandi ku mi, pero mi tabatin e plaser di mira e meneer aki djaserka. Tremendo pelotero i tremendo persona.

“Un señora a bisa mi pa kompará Andruw i Andres ‘Henry’ Jones. Mi a bisa ku Henry Jones ta mihó atleta ku Andruw. Mi a mire hunga beisbòl, basket, vòli futbòl den tremendo forma tur e deportenan aki den e mihónan. Andres Jones tabata kore masha duru mes, meskos ku su yu Andruw sin ‘hustle’ á

Andres ta kore un bala riba un suave bayendo patras di banda mas duru ku kualke hungadó ku ta koriendo bai patras di frente, ku kara. Algu inkreibel. Andres ta hunga aden gewon pero bo no por bañ’é fásil. E yu tin mas power kuné pero pa bati si e tata ta mihó.

Den 1980 nos a pèrdè bira sup kampion i 1981 nos a kue e titulo atrobe. Ye Zimmerman, Rudson Roberto, Raymond Zoerka, ets. Tabata den tim. Pa mi e aña ei tabata di Rudson Roberto, e mucha hòmber ei a subi dòbel A i hasi dòbel A di dje. Tira masha bon mes i hasi Scorpions kampion. E tabatin un bala ku ta kibra bai afo.

Raffy ku su bate den man semper tabata un menasa serio pa pitchernan.

RIVAL FUERTE/KOSNAN MEMORABEL

“M’a respetá tur hende komo batiadó, un hòmber ku na bate den man por hasi bo tim daño. Mi tabatin problema ku Yubi Mercelina. Su forma di tira tabata kompliká. E tabata na bo lomba e tabata tira e bala ‘from nowhere’. Mi no tabata ‘guess’ muchu pero Yubi tabatin hopi éksito kontra di mi.

Mi a yega i ‘guess’ algun biaha i mi a dal e bala masha leu mes. Mi a ‘guess’ Reumert Monte, George Brown i m’a ‘guess’ tambe na Sto. Domingo. Einan i tambe riba un lansamentu di Reumert Monte m’a ‘guess’ i e bala a bai masha leu mes. Esun ku mi a ‘gues’ di Reumert a sali for di Stadion den SDK den right center. Mi mes a spanta e dia ei, pafo di Stadion. Ela tira mi un rekta aden, strike, bolbe tira mi un rekta aden, mi a pidi ‘time’ Mi no a para mesun serka di e plato, e bala a bolbe bin rekta aden i mi a konekt’é leu den right center for di stadion.

E otro homerun leu di ‘guess’ tabata na Santo Domingo, na 1986, hungando kontra Santo Domingo promé wega mi a tende e manager ta bisa e gai tira kurva. Mi a saka e bala pafo di stadion den centerfield. Un bateadó so, un merikano, a yega di saka e bala ei dje leu ei.

“Otro kos ku mi ta kòrda ku den e final di aña 1985 m’ hunga ku pia malu den kontra Santa Rosa. Andres Jones ku tabata kasi retirá a bin remplasá mi el a bisa mi e no por. Mi a bisa Djo Djo Wilsoe ku tabata manager di Scorpions e tempu ei ku mi no por. Mi por a bati so mi no por a kore. Mi a bai tòg, mi ta kòrda ku m’ konektá homerun kontra Papito Stewart i pa kolmo ku e pia malu ei skor e kareda di gana pa Scorpions bira kampion.

Hungadonan bon ku mi a hunga kontra dje i den tim huntu ku nan: Andres Jones, tremendo, defuntu Willy Pietersz, super, Keller, bon picher bon batiadó, Fichi tremendo batiadó i fildiado, Nato bon hitter bo faya e ta bati hit fásil pa right,  Lipo Elhage hopi forsa mes, Philip ta bon mes, Philip ta pone e picher tira strike, Wenny Jacoba bon hungadó.

Papiando di dòbel A, tempu mi a subi dòbel A na Aruba mi no tabata hunga tur dia I tin wega mi tabata sali for di wega saliendo batiendo di 2-2. Mi a yega sali kampion bate di Kopa Antiano den mi promé aña den dòbel A empatá ku Willy Pietersz, di dos den kareda empuha tras di Willem Spanner.

Mi a yega di bati hopi riba .400 mi a yega di bati .485.Mi a yega di bati .400 i no sali kampion bate.  Mi a sali hungadó mas balioso na mas ku 4 okashon.

Ta kontinuá den edishon di mayan....

Raffy Jozefa den ‘sliding’ buskando pa skor kareda.