Kontinuashon di artíkulo riba karera di Raffy Josefa (dfm). Entrevista ku Jeffrey Martina den luna di febrüari 2002.

1979

Mi mihó aña den beisbòl. Mi a gana triple korona sali MVP. Mi a kibra mi mes rèkòrt di homerun. E rèkòrt  di mi mes tabata 11. M’a bati 16 homerun den e temporada ei den 24 wega. E aña ei kompletu mi tabata un hit pa mi bati .500 overall. M’a konektá 23 homerun e aña ei kontando play-off ku Kopa Antiano etc. aden. M’a gana tripel korona den Kopa Antiano tambe. Kontra Marlboro tambe e aña ei, ma bati un homerun kontra Ron Stewart ku a dal riba waya bin paden. Tabata un homerun bisto pero umpirenan no a mir’e sino lo mi a kaba aña ku 17.

E nòmbernan ‘Stofzuiger i tambe Poder’ ta Orlando Cuales a bini ku nan. Mi ta kòrda tambe ku mi tabata kue un drive di dal 10 homerun den lapso di tres siman. Despues e ta baha e ta bira unu den algun dia despues e ta bolbe subi atrobe.

...Raffy Jozefa den kompania di su señora esposa...

For di mucha Raffy Josefa a kuminsá biaha ku selekshon. “Den Hubenil mi a bai ku un selekshon ku tabatin Eddie Ras, Elias Kock, Richard Simmons, Fio Webster, tremendo selekshon.

M’a forma parti di tur selekshon for di dia m’a hunga beisbòl. Mas o ménos na aña 1982 òf ta 83 m’a keda for di un selekshon Panamericano di kual Aruba tabata base i nan a laga mi afó. ‘Voor de rest’ tur selekshon m’a hunga. Den mi último aña mi a bai ku selekshon komo coach.

M’a sali kampion bate den selekshon 1972 na Haarlemse Honkbalweek. Na 1986 mi a sali mihó hungadó amatùr na Santo Domingo.

Nos a puntra Raffy Josefa tokante di batimentu pafó. Tabatin hopi papiá ku Raffy no tabata bati ora e bai afó ku selekshon.

Raffy: Ta bo ta promé hende ku ta puntra e kos ei. Bèrdat den kuminsamentu tabata bai malu. Mi a analisá mi mes kiko mi problema tabata. Mi a bin saka afó i el a drecha.

Aña ‘68 mi a bai Hulanda ku Italia, na ‘69 mi a bai Santo Domingo a bai basta bon. Na ‘71 tabata Cuba. Mi problema mas grandi tabata di trata na hasi mas ku mi por. Tur biaha ku m’a bai afó mi tabata trata di hasi mas ku mi por. 1972 mi a bai Haarlemse Honkbalweek mi a sali kampion bate. Despues nos a bai honkbalweek un biaha mas,faltando un wega mi tabata di dos den bateo. Na Indianapolis mi tabata den e promé dies. Na Santo Domingo ‘86 mi a bati bon, ‘80 piku na Cuba tabata kimando e liga faltando dos tres wega. Mundial na Cuba m’a sali entre e lidernan den doblete. Mi promé dos tres añanan mi a hunga malu. Mi ke a demostrá ken mi ta i mi no a logra.

Beisbòl di ántes i awor ta fásil. Antes nos tabata train hopi tur dia. Mi tabata hunga den Scorpions i mi tabata train tur dia. Mi tabata bai tempran tereno di Suffisant ku mi bate i wante ku bala mi so bai train. Tin hende por a bisa ku ta loko mi mester ta nos tabata train mes.

Hòbi

“Deporte en general. Mi gusta spòrt en general, mi gusta tur spòrt ku tin i mi ta al tanto di tur. Mi hòbi sí awor aki ta golf. Tur wikènt mi ta golf. Si bo no a bin entrevistá mi awor aki lo mi tabata riba kancha di golf.”

Otro kosnan

Raffy: Mi plato faborito ta bakiou, ku batata dushi ku su yams, ku su domplin ku e kosnan ei. Pa loke ta outo mi outo preferí ta Cadillac. Si mi tabata por lo m’a kumpra un Cadillac. Mi ta kere lo mi logra unu si. Mi ta un hende ku ta biba manera mi por, mi no ta forsa bara niun kaminda. Lokual mi por ‘affort’ mi ta hasi lokual mi no por ‘affort’ mi no ta hasie. Mi por ‘affort’ un Cadillac for di awor aki pero tin otro kos ku tin prioridat.”

...Golf a bira Raffy su pashon despues di a retirá for di beisbòl...

Bon eksperensia

“Den Deporte ? Bon eksperensia hungando deporte mi a siña konosé mi mes i konosé hende. I ma siña kiko ta union, kiko ta bèrdat di kolega den deporte ku gusta e wega. Bo ta mira kiko abo ta duna i kiko nan ta duna pa sali ku lo máksimo. Deporte ta i tabata bon pa mi”

Mal eksperensia

Raffy: Un kampionato Centro Americano y Del Cariba na Cuba. Mi tabata way out. Mi no tabata konta mes. Promé biaha den mi bida ku nan a pone mi banki i nan a pone mi ku nan rason tambe. Mi no a reklamá niun hende nada. Mi a sinta apoyá manera mester ta. Mi tabata malu malu, nada no tabata bai bon.”

Mensahe

Raffy: Esnan den deporte. Si bo ke bira un bon deportista bo tin ku praktiká anto praktiká bon, serio. Esnan ku ta train e muchanan, trata di siña e muchanan di e forma korekto. Mi no ta bisa ku tin hende ta hasi mal trabou, pero komo tékniko trata na sa mas tantu posibel di e wega. Siña e wega korekto, siña e mucha fildea un bala korekto, tira un bala korekto. Hasi tur kos manera mester ta.

Hungadónan stòp di wak direktiva ‘zorg’ pa bosnan tei hasi bosnan trabou i direktiva lo hasi nan trabou. Raffy ’Stofzuiger, Poder’ Jozefa ta terminá e entrevista.