WILLEMSTAD.- Raichel Brito ta un hóben multitalentoso, e la kuminsá desaroyá su talento na Curaçao Talent & Showbizz College.
Na Curaçao Talent & Showbizz College el haña training di baile i aktuashon. Despues di su preparashon na CTSC el a a bai Ulanda bai studia na akademia di baile i awor e ta un sensashon formal riba social media ku su clipnan di aktuashon i baile i tambe lipsyncing.
Raichel a haña oportunidat di krese den e mundu teatral i a aktua ku aktornan lokal grandi kual ta Pachi Damon, Edion Booy, Cynthia Ricardo, Mireille Adelina i hopi mas.
E produkshon di Bon Bini Holland 2 tabata buskando un hende ku por  hunga e ròl di anunsiadó di karta pa e tan famoso wega di ‘Bon kuné’. Raichel no a pèrdè pa gana i a oudishoná pa e haña e ròl.
Su bentaha tabata ku anteriormente Raichel mes a hunga den un komedia dirigí pa Jandino, kual ta “Makamba pretu”. Raichel a splika den nos kombersashon kuné ku:  “E tim di produkshon a tuma kontakto i ma hasi un semi tryout via video i nan a tuma mi pa e ròl aki. Traha den un produkshon grandi asin’aki ta un eksperensia sumamente leuk i algu nobo. Esaki ta algu hinteramente otro di lokual mi ta kustumbrá kuné riba stage i ku mi kámara di telefòn”, Raichel a sigui konta.
“Pero sigur algu leuk pa hasi. Aworakí mirando ku mi tin un plataforma p’ami por ekspresá mi mes mi ta bai hasi uso di dje pa duna mas mensahe positivo i sigui inspirá e hóbennan pa nan pusha pa nan por yega, mi mes ketu bai ta bezig ta pusha i sigui ta e ehèmpel positivo pasó nos yu di Kòrsou por yega leu basta nos ke i sostené otro”, asina Raichel a terminá bisando.