WILLEMSTAD.- Durante e di sinku edishon di Paranda di Fin di Aña djabièrnè i djasabra awor na Brakkeput Mei Mei, Randal Corsen Orchestra (RCO) lo presentá un programa musikal variá atrobe.
Loke sigur nan lo inkluí ta e produkshonnan nobo manera ‘Dushi Sintimentu’ kantá pa Dibo D ku ta kosechá éksito grandi na e diferente radionan i e tumba mas resien ‘Un Dia Nobo’ kantá pa Rich Pieter ku awor ta kue merkado. Loke tampoko no por faya ta e promé produkshon propio ‘Henter Aña den Paranda’ skirbí pa Yumarya Grijt ku RCO a lansa aña pasá.
Na 2014 a introdusí un tradishon nobo ku e konsiertonan den kuadro di Paranda di Fin di Aña na Landhuis Brakkeput Mei Mei. Riba dianan 28 i 29 awor e orkesta ta enserá atrobe e kantantenan Dibo D(oran), Rich Pieter i Yumarya Grijt, miéntras ku meskos ku dos aña pasá Izaline Calister t’ei komo wéspet spesial.
E músikonan ta Eric Calmes (baho), Rhazul Sebelon (kuarta), Pernell Saturnino, Ernie Gregorius, Royston Hato i Eric Brigitha (perkushon), Marlon Conradus (drùms), Christopher Wallé (sinthesyzer) i e supladónan Igort Rivas, Ismael Gonzalez, Fefelo Martinez (tròmpèt), Hector Sampson i Joselo Jimenez Rijo (trombon), bou di guia di e pianista, kompositor i areglista Randal Corsen. E parti di e zonidu ta na enkargo di Oscar Bor. E konsiertonan ta kuminsá 8:30 or di anochi.
Manera tur aña, e lider di banda Randal Corsen a hinka un programa variá den otro ku produkshonnan propio, kombiná ku piesanan lokal i internashonal ku ta kuadra den e ambiente di Pasku i fin di aña.
Brakkeput Mei Mei tin komo patrosinadornan Bacardi, Dewar’s White Label i Fun Miles. Por sinta, pero ora e músika kue kurpa, tin posibilidat pa balia tambe. Benta di karchi na rason di 65 florin pa persona ta na Mensing’s Caminada, Van den Tweel Zeelandia i Jan Thiel i ofisina di Fun Miles. Si sobra lo bende karchi ainda na porta tambe riba e dos anochinan.