WILLEMSTAD.- E di seis edishon di Paranda di Fin di Aña djasabra 28 di desèmber na Brakkeput Mei Mei lo kontené, aparte di un programa musikal variá di Randal Corsen Orchestra (RCO), komo novedat un porshon humorístiko. E produkshonnan di RCO di e aña aki no por keda afó tampoko, ku kanto di Dibo D, Rich Pieter, Yumarya Grijt, pero alabes RCO ke yega na un forma di interakshon ku e públiko.
Na 2014 tabatin e promé edishon di Paranda di Fin di Siman ku piesanan nostálgiko di e temporada di aña. Esei ta e kaso un tiki ainda, pero ademas lo interpretá piesa nobo ku nan a saka e aña aki, manera e aktual hit number 1 ‘Mi n’ ta gaña’ i ‘Fin di aña na Kòrsou’.
Loke ta nobo ta ku RCO lo pidi hende for di públiko pa bin presentá ku nan. Tambe lo tin un wéspet invitá, e figura ‘Piep Piep’ – esnan ku konos’é ya sa ku esaki lo duna e programa un toke humorístiko. Den e kuadro aki Dibo D ta hunga otro papel prominente. Den e mesun forma lo tin tambe elekshon di ‘Hòmber di Aña’; hasta e nominadonan pa e título di honor aki lo anunsiá e anochi numa. E konsierto ta kuminsá 8:30 or di anochi i entrada ta habri un ora promé, pasobra otro novedat ta ku koperashon di Bacardi i Dewar’s White Label ku ta bai tin un Mojito Bar i tambe un Food Corner.
Benta di karchi
Karchi ta optenibel na Mensing’s Caminada, Van den Tweel Zeelandia i Jan Thiel, Beep Beep i e ofisina di Fun Miles. Solamente si sobra lo bende karchi ainda na porta e anochi ei.
E músikonan ta Eric Calmes (baho), Rhazul Sebelon (kuarta), Marcus Istatia, Gibi Lourens i Royston Hato (perkushon), Marlon Conradus (drùms), Christopher Wallé (sinthesyzer) i e supladónan Igort Rivas, Ismael Gonzalez, Fefelo Martinez (tròmpèt), May Peters i Joselo Jimenez Rijo (trombon), bou di guia di e pianista, kompositor i areglista Randal Corsen. E parti di e zonidu serka Oscar Bor ta den bon man.