WILLEMSTAD.- Aña pasa òktober, Randal Corsen Orchestra (RCO) a kuminsá ku un proyekto pa graba i lansa 5 piesa original pa farándula di Kòrsou i duna un kontribushon na muzik popular na Papiamentu tresiendo produkshonnan di nivel haltu den e diferente géneronan popular di nos farándula.
E proyekto a inisiá ku grabashon di un tumba pa fin di aña ‘Henter aña den Paranda’, un komposishon di Yumarya Grijt, kansion aki a duna Randal Corsen e smak pa sigui graba piesanan original. Pa por realisá e proyekto a aserka Prins Bernhard Cultuurfonds Caraibisch Gebied pa un aporte i nan a honra esaki.
GRABASHON
E promé piesa ku a graba tabata ‘Dushi Sentimentu’ kanta pa Dibo D, sigui pa ‘Un Dia Nobo’, un tumba interpretá pa Rich Pieter.
A tarda promé ku a saka e di tres piesa, pero luna pasa e di tres piesa, ku ta e timba (Salsa Kubano moderno) na Papiamentu titulá ‘Mi bon Amigu’, interpretá pa Yumarya Grijt a keda lansa.
Despues di saka 3 piesa, kada un interpretá pa un dje solistanan di RCO (Dibo, Rich i Yumarya), ta toka turno pa Dibo estrená e di 4 produkshon.
Randal Corsen ta kuminsá splika ku ta trata di e promé piesa semi-romántiko di RCO. ‘Bo por konsiderá ‘Dushi Sentimentu’ tambe un piesa ku e tema amor, pero esei ta den un konteksto mas general. Den kaso di e piesa aki ‘Mi’n ta Gaña’, hopi hende por identifiká nan mes kuné. E piesa tin dos tema: Amor i Yaluzi, pero tòg no di un manera muchu serio. E no ta un piesa pisa’.
‘Ta un kansion ku ta papia di un mucha hòmber ku ta bisa e damita ku no tin motibu pa ta deskonfiá den dje i ku e ta fiel na su mamita, konfiansa ta duna e amor balansa’, asina Dibo D ta splika.
Randal Corsen ta kontentu ku e por a produsí un montuno ku RCO, paso ta un género ku e gusta. ‘Semper mi tabata gran fanátiko di Doble R i di Arnel i su Orkesta. Mi ta kere e oyentenan lo por rekonosé nan influensia den mi areglo. Ademas di esei Dibo tin e den su sanger, su tata Gibi ta un gran kantante i kompositor di montunonan ku a bira sumamente popular den nos farándula. Ku e piesa aki nos ke tres un homenahe na Doble R, Arnel i su Orkesta i Gibi Doran pa tur loke nan a nifiká den e género aki na Kòrsou’.
MUSIKONAN
Pa e grabashon aki Randal a hasi uso di su músikonan di promé ora, integrantenan di RCO ku ta Pernell Saturnino – konga; Ernie Gregorius – sobra perkushon i Lonte Conradus – drums. Rich Pieter, Royston Hato i Dibo a kanta koro. Igort Rivas a graba tur trompèt i pa promé biaha RCO tabatin e honor di por a konta ku partisipashon di e ‘promé trombonista’ i un dje fundadónan di e grupo Kubano sumamente popular Havana d’Primera ku ta Amaury Perez, ela graba e trombonnan. Komo músikonan invitá a partisipá Hershel Rosario riba bas i Sheena Bishop den koro. Grabashon, mixing i mastering tabata den man di Oscar Bor, manera semper.