WILLEMSTAD.- Un tremendo edishon di Kantadó Mayó ta loke ku e públiko ku a tabata presente na e evento den Curaçao Festival Center djasabra anochi a presensiá. Trinta partisipante a presentá nan komposishon kompañá pa gruponan rítmiko ku a kompañá e partisipantenan di un forma fenomenal. Hopi bon kompañamentu i un kantidat di partisipante ku a duna tremendo presentashon. Ounke e evento a terminá te den oranan lat di mardugá, pero mester remarká ku e públiko a keda i biba ku presentashon di kada un dje partisipantenan. E evento sigur tin tur ingrediente pa sigui krese i tambe tin un futuro briante su dilanti si bo tuma na konsiderashon kuantu hóben ta partisipando den e evento.

PREMIASHON Premio Estímulo a bai pa Dion Mogen; Trahe maskulino – Rashid Anthony; Trahe Femenino – Damisha Reed-Gregorio; Kantante Mas Popular – Damisha Reed-Gregorio; Mihó Letra – Rashid Felida; Bos i Entonashon – Damisha Reed-Gregorio; Mihó Aktuashon – Rashid Felida. Di kuater finalista – Rumichel Marchena; di tres finalista – Ishahier Monte; di dos finalista – Rendrick Djaoen; Prome finalista – Damisha Reed- Gregorio i Kantadó Mayó 2017 a resultá Rashid Felida ku a presentá e komposishon titulá “Seú pa Dilanti”, un komposishon di Marvin Snijders ku areglo di e tim di HPA (Hóben Positivo i Aktivo).