WILLEMSTAD.- Djasabra 21 di yüli Blue Bay ta organisá su show ku sena tradishonal, kompletamente den e esfera klásiko merikano di añanan ‘50 i ‘60, titulá ‘Rat Pack Dinner Show’. Ku músika di Frank Sinatra, Sammy Davis i Dean Martin, e show ku bufèt sukulento akí lo presentá músika di tres baluarte musikal popular di e famoso Rat Pack di ántes.
Riba djasabra 21 di yüli e restorant i playa di Blue Bay lo bira e dekòr di un anochi kulinario musikal fasinante ora ku trese músika di e grupo di artistanan famoso yamá Rat Pack, ku tabata entretené mundu ku nan músika, aktuashon, sine i fiestanan na añanan ‘50 i ‘60. Tononan di e hitnan musikal grandi di e artistanan famoso lo zona riba e playa idíliko di Blue Bay, miéntras e kushina di e restorant lo ta preparando un sukulento bufèt.
Artistanan konosí, internashonal lo presentá e hitnan mundialmente popular di e grandinan manera Sinatra, Davis i Martin, rebibando asina e temporada ku Rat Pack tabata popular den añanan ‘50 i ‘60.
E prestigioso kantante merikano, Armando Kortbus Diaz, lo kaptivá e públiko ku su grasia i pashon, ora e trese hitnan di Frank Sinatra kargá ku nostalgia pa deleitá su públiko. Su bos ta zona meskos ku di Sinatra i ta hiba bu bèk den tempu na e añanan di gloria di ’50 i ‘60. Diaz, meskos ku Sinatra, a lanta na Merka i ta un merikano te den su higra. Su forma elegante di trese un kansion ta sin igual. Kada tono ku e kanta ta trese alma di Frank Sinatra bèk riba tarima. Durante e dies añanan tras di lomba Diaz a duna shownan vislumbrante na diferente lokashon.
Mester hasi reservashon pa e dinner show akí, kual lo tuma lugá djasabra 21 di yüli na Blue Bay. Por skohe entre sinku opshon na preisnan kuminsando for di 65 florin te na 1.250 florin pa e opshon mas luhoso pa ocho (8) persona. Tambe tin posibilidat pa kumpra karchi pa e show so. E kantidat di karchi pa e anochi eksklusivo akí ta limitá. Karchi ta optenibel via www.bluebay-curacao.com/ratpack
Pa mas informashon tokante e evento, entretenimentu i opshonnan kulinario di e anochi akí por sigui e página di Facebook di Blue Bay. Por hasi reservashon na: beach@bluebay-curacao.com