WILLEMSTAD.- E tremendo hungadó hoben, Ray Jackson Chirino, a firma ayera ku e organisashon di Cincinnati Reds. Tabata un momentu sumamente grandi pa e hóben di 16 aña kaminda su soño a bira realidat di por firma profeshonal. E outfielder a mira akshon den diferente selekshon di Liga Pariba último añanan i sa di presta na nivel haltu siendo ku e selekshonnan aki. E organisashon ta mira Chirino komo un posibel leftfielder òf rightfielder ku bon brasa. Segun e skout di Reds na Kòrsou, Fermin Coronel, aktualmente e brasa ta averahe pero ku práktika esaki por sigui mehorá. Loke mas e ofisialnan di e organisashon a gusta di Chirino ta su tremendo poder. Akinan Sr. Coronel a papia di poder den direkshon di e bateadó poderoso di New York Yankees Giancarlo Stanton. Espektativa ta ku e hóben talentoso aki lo krese i su kurpa por yena i bira den direkshon Stanton. Tur esaki dimes tin ku bai tambe ku e alimentashon korekto i tambe ehersisionan ku e mester hasi. Chirino, kende mester tabata miembro di e selekshon di Senior League, a preferá di no forma parti di e selekshon pa motibu ku e tabata kier a firma den e dianan aki. Aworakí e intenshon ta pa Chirino bai Repúblika Dominikana pa entrená i lo bai forma parti di Tricky League na e pais dominikano. E no por partisipá na e Dominican Summer League ya ku esei a kuminsá kaba. Despues di Tricky League, lo e partisipá den liga instrukshonal na òktober na Repúblika Dominikana mes i mas despues prepará otro aña pa e Dominican Summer League. Un pabien na Ray Jackson Chirino huntu ku su mayornan i spera ku lo e bai tin hopi éksito den su karera profeshonal.