ULANDA.- E produktor, regisor i aktor yu di Kòrsou, Raymi Sambo lo ta regisor dje pelíkula ‘Aan niets overleden’, un obra teatral ku lo keda kombertí den un pelíkula.
‘Aan niets overleden’ ta konta di Thilda, kende huntu ku su yu muhé, Joyce i su yu hòmber, Kelvin ta biba den un flat na Bijlmer.
Kelvin tin aids, e pa bèrgwensa di Thilda e ta tené skondí den kas. Dor di esaki e hóben no ta risibí e kuido adekuá i su situashon ta empeorá.
E ròlnan prinsipal dje pelíkula ta keda interpretá pa Perla Thissen, Jaike Belfor, Erwin Boschmans i Jonata Taal. E pelíkula ta keda produsí pa ‘WonderPix’ i grabashon ta kuminsá otro siman, 22 di febrüari 2018.
Sambo durante di vários aña ta luchando pa tin mas pelíkula di ‘hende di koló’ den teatronan ulandes, na televishon i den sine.
‘Na Ulanda no ta produsí pelíkula kaminda aktornan di kolo tin e ròl protagóniko. Bo por hasi dos kos. Sea bo ta reklamo òf bo ta tuma e desishon pa hasi esaki’, asina Sambo a deklará na medionan ulandes.
‘Aan niets overleden’ su estreno lo tuma lugá den luna di yüli 2018 durante di e kongreso mundial di Aids ku lo tuma lugá na Amsterdam, Ulanda. Despues di esaki e pelíkula por ser mirá na teater di sine.