WILLEMSTAD.- Asosashon di Músiko i Artista di Kòrsou a haña ta nesesario pa reakshoná despues ku riba retnan sosial a publiká algun imágen i komentario relashoná ku ensayo ku tabata tumando lugá den Festival Center.

Di parti AMAK nos lo kier trese e siguiente aklarashon relashoná ku e publikashonnan awe mainta riba ret sosial.

Na Curaçao Festival Center tabatin un ensayo, relashoná ku preparashonnan pa  e Tumba Revival Festival 2021.

Den reunion di djasabra entre AMAK i funshonarionan di Gobièrnu, a bin un proposishon dilanti, pa laga e miembronan di orkesta pasa un tèst di Covid -19.

Dr. Izzy Gerstenbluth a pidi pa e mes bin splika e motibunan pakiko ta importante pa pasa e tèst.

Dr Izzy Gerstenbluth no a bin para ningun ensayo. Su presensia tabata, pa splika e miembronan di e orkesta bou di direkshon di Maestro Gregory Colina, e motibunan ku tur e músikonan mester pasa e tèst, pa di e forma ei garantisá, ku e evento ta tuma lugá na un manera seif.

Komo ta trata aki di un medida ku e tim di krísis a anunsiá na último momento, esei a kousa resistensia seka e miembronan di e orkesta. Nan ta di opinion, ta di kon a permití eventonan tuma lugá durante dianan di fiesta na un planta lokal, den un espasio chikí aire -kondishoná, i awor ku tin un espasio 10 x mas grandi den aire liber, ta pone tipo di eksigensianan asina ki den korto tempu.

Enbèrdat na prinsipio tabatin diskushonnan fuerte, pero na final partidonan, den un ambiente mas trankil a trata na yega na sierto palabrashonnan.

AMAK, djaluna den oranan tempran, lo trata na yega na un solushon definitivo pa kontinuashon di Tumba Revival Festival.

FOTO:

Manfred ‘Feco’ Gomes, presidente di AMAK.