WILLEMSTAD.- Aki un siman, riba djabièrnè 4 di sèptèmber, lo reanudá Buèlta di 6 di promé divishon futbòl FFK. E federashon ta anunsiá ku despues di e ‘break’ ku a tuma pa motibu di Coronavirus, pa otro siman lo reanudá e kampionato den tur tres divishon.

E reanudashon dje kampionato lo tin su kambionan den sentido ku 1e divishon lo hunga solamente riba djabièrnè i djasabra, miéntras ku segundo divishon ta hunga riba djárason i terser divishon por lo general riba djadumingu.

Pa loke ta trata promé divishon, otro siman djabièrnè ta reanudá ku e partido entre Jong Holland (rèkòrt 2-0) i Willemstad (rèkòrt 2-0), siguí djasabra pa Scherpenheuvel (1-1) v/s UNDEBA (0-2) i Vesta (1-1) kontra di Barber (0-2). Tur e partidonan ta den Stadion Ergilio Hato.

Reglanan pa drenta stadion

FFK ta rekordá tur fanátiko ku durante e buèlta di 6, lo kontinuá ku e registro na porta. P’esei FFK ta hasi un súplika na tur fanátiko pa yega trempan pa e registrashon i mantené distansia sosial di 2 meter! Ta bon tur fanátiko bai stadion ku un tapa boka (mondkap) pa bo mes protekshon. Tambe FFK ta rekordá ku Gobièrnu a stipulá ku ta solamente 250 persona por drenta stadion, tene esaki na kuenta!

Preis pa Liga MCB Promé Divishon buèlta di 6 ta fl.6,- pa adulto miéntras mucha di 6 te 12 aña i tambe 60+ ta kosta solamente fl.3,-.

Entrada pa Liga MCB Segundo Divishon buèlta di 6 ta fl.4,- pa adulto miéntras mucha di 6 te 12 aña ku 60+ ta paga fl.2.50. Liga MCB Terser Divishon ta kompletamente grátis!